Thursday, March 10, 2011

Sugilanon Ni Tita Linda


Ni Tita Linda Belayro
Saeamat Sa Ukay-Ukay
Maskin siin nga kanto makaron hay may mga ukay-ukay ka nga makit-an. Maskin iya sa Kalibo hay abo mang ukay-ukay nga baligya. Halin sa blouse, sae-wae, t-shirt, sapatos, bag, kaeo, jacket ag iba pa hay maka bakae kita. Mabahoe nga bulig ro ukay-ukay eabi guid sa kubos nga pamilya tongod durably, may postura ag barato pa. Maskin man ngani ro mga mang- garanon hay naki dut-dot man agod mag ukay.

Kon nakabulig ro ukay-ukay sa mga kubos, naapektuhan guid it abu ro mga department stores tongod imbis nga magbakae it bag-o ro mga tawo, idto eon lang sanda naga ukay ag magbakae sa ukay-ukay.

Isaea eon si Aling Oreng ag si Marites nga naka panimueos, naga bakae ag habuligan it ukay-ukay. Isaeang ka labandera si Aling Oreng ag naga labada imaw sa mga pamaeay kada Sabado. Manog tapos sa fourth year high school si Marites. Sa anang eskwelahan, nagkasugot ro mga ginikanan nga may graduation ball ro andang mga unga. Maskin indi masarangan ni Aling Oreng ro gaeastusan, nagpahando imaw. Guin tinguha guid nana para madunggan man ra anang solo nga onga nga si Marites.
Ko agahon ngaron, guin tipon nana ro mga eabahan sa iba-ibang pamaeay agod daehon sa andang bubon. Guin taw-an man imaw it bayad sa anang guin daeang mga bag-ong plantsang mga eambong. Sa anang pag uli, naka agi imaw sa tindahan it ukay-ukay.

May naga kabit nga gown nga owa guid it naga bakae. Parang may naga tueod kana nga bak-eon ro gown. Busa guin bakae nana ag ro guin bayad hay suhoe nana sa paglabada. Guin uli nana ro gown agod eabhan. Sa anang pagkuso, habatyagan nana ro mga matig-a nga hawak ag abaga ko gown. Anang guin tastas ag hakibot imaw nga puro papelon nga dolyar ro sueod. Guin hakos nana ro mabasa nga gown tongod sa kalipay.

Pag abot ni Marites, abu guid ro andang pasaeamat tongod sa guin tao nga grasya ko ukay-ukay.

Pagkatapos it graduation, hakita ko mga tawo ro bag-ong tindahan ni Aling Oreng. Owa man sanda mahangawa tongod masyadong mahugod guid mat-a si Aling Oreng. Matsa uwa kapilahi ag nakatapos eon it curso sa pagka maestra si Marites. Guin baton man imaw nga manog turo. Una imaw naga turo sa andang baryo. Una man naka hanger ag naka putos it plastic ro gown nga ukay-ukay. Indi guid matapos-tapos ro pasaeamat ni Aling Oreng ag ni Marites sa rondayang gown halin ag barato pa sa ukay-ukay. /MP

No comments: