Sugilanon Ni Tita Linda

Ni Tita Linda Belayro

Magic Koeon

Ro banwa it Lezo ag Ibajay hay daywang ka banwa iya sa probinsiya it Akean nga kilaea sa andang produktong koeon. Maeahaeon ro koeon sa mga sinaunang tawo tongod rondaya ro guina sudlan it pang-haead sa mga anitos. Rikara man guina sueod ro dugo agod ihaead kaibahan ko mga vino o sagrado nga tubi para sa andang diyos-diyos.

Sa isaea ka bukid sakop it Colong Colong, Ibajay, may naga estar nga ermitanyo. Bihira imaw nanda makita rondayang magueang. Naga pana-og ra imaw sa datag kon adlaw it tiyenda sa Poblacion. Mabuot rondayang ermitanyo ag guina abi-abi imaw ko mga tawo kon mag-abot. Bilang kabaeaslan, guina taw-an nana ro mga tawo it mga bueong nga maka mayad it masakit o kon indi hay guina bueong nana ro mga onga nga masakiton.

Isaeang adlaw, may isaeang ka bakero nga naga pahang-eab ko anang anwang maeapit sa baeay it ermitanyo. Nangin ugali ko rondayang binatilyo nga mag panguma sa datag agod magpamu-po it mga prutas.

Isaeang hapon, hakita nana ro ermitanyo nga naga tiphag it eapok ag guin hurma nga koeon. Pagkatapos anang guin dap-ongan it tinumpok nga li-ay ag dayami. Pagtaliwan it pilang oras, naeaha eon ro koeon ag dayon guin pasilakan, guin buead. Guin tandaan ko binatilyo ro anang hakita. Anang guin tun-an ro anang mga igmanghod hasta nakahimo man sanda it iba ibang korte it koeon. Abo nga naila ko andang obra. Pagbisita ko anang igkampod nga taga Lezo, naghambae imaw nga may una man sanda nga imaw nga klase nga eapok nga guina tawag nga buga o daga.

Nag obra man sanda idto sa Lezo ag abo man ro nag antigo.

Makaron, bukon eamang it koeon ro guina obra it mga taga Lezo ag Ibajay, kundi sari-saring sueodlan nga guina gamit sa atong pamaeay. /MP