Ni Tita Linda Belayro
Arko Nga Bueawan
May isaeang ka prinsesa nga maisot pa eang hay masakiton eon. Agod malipay ro prinsesa, hay guin pa obrahan imaw it hardin nga una ro tanan nga kolor it kabueakan. Tongod sa kasadya ko hardin, abo nga mga onga ro naga hinampang agod perming malipayon ro prinsesa. Husto man tongod nangin malipayon guid ro prinsesa hasta imaw nagbahoe ag nag daeaga. Abo man nga mga prinsipe ro naga pangasawa kana ogaling owa guid imaw it naila-an.
Isaeang adlaw, may nahanaeang nga soldado ag naha-agi imaw sa hardin. "Ano baea ro manami idto sa sueod nga nangin interesado imaw?" Busa, nagsueod imaw ag naka batyag imaw it kalinong sa anang paino-ino. Halipatan nana ro anang kahadluk ag kamingaw sa anang pamilya. Abo ro anang kalipay tongod sa anang hakita.
Sa anang pag uli, guin sugid nana ro anang haagyan. Nag eapnaag sa bilog nga kalibutan ro balita ag kada isaeang nasyon hay bu-ot nga maka adto. Samtang abo nga tawo ro naga batyag it kalinong ag kalipay, amat-amat man nga naga eoya ro prinsesa. Naeo-oy ro mga tawo nga maeapit kana tongod sa sitwasyon it prinsesa.
Guin tawag tanan ko hari ro mga eksperto nga doctor sa guina batyag it prinsesa agod masugponan ro anang kabuhi, ogaling owa guid sanda it mahimo. Guin tawag nana tanan ro anang mga amigo ag amiga. Guin bilin nana nga tatapon ro anang hardin. Sa kaeo-oy ko anang mga amiga, guin hinyo nanda sa mahae nga hari nga una imaw i-eobong sa tunga ko anang hardin .
Tumaliwan ro mga inadlaw, hakibot ro mga tawo nga naduea eot-a ro hardin. Owa guid it naka sayod kon siin haadto ag kon sin-o nag bo-oe ko mga tanum. Nagtinangis ro tanan. Sa pag tangda nanda sa eangit, may hakita sandang arko nga may sari-saring kolor, kapareho ko kolor ko kabueakan sa hardin it prinsesa.
Naghugyaw ro tanan. Guin daea ko prinsesa ro anang hardin. Kada mag usoy ro tawo sa hardin, ga tangda eamang sanda ag andang makikita ro hardin paagi sa isaeang ka baeangaw. Halin kato, owa eon sanda guina mingawa sa prinsesa bangod ro anang oyahon idto makita sa baeangaw pareho it arkong bueawan. /MP
No comments:
Post a Comment