Sunday, April 17, 2011

Sugilanon Ni Tita Linda

Ni Tita Linda Belayro


Ro Nunok Sa Banwa It Balete


Sa may tindahan sa banwa it Balete, hay may mabahoe nga puno it nunok o balete. Suno sa mga katigueangan, owa pa it puno ngara kato ag kon sin-o man ro nag tanum, owa gid it naka sayod. Pag bahoe ko rondaya nga punongkahoy, may nababatian ro mga tawong naga estar sa maeapit sa nunok ngara nga musika kon gabii. May mga kalansing man it mga kubyertos nga matsa may okasyon, eabi guid kon mahayag ro buean.

Guin paban-aw nanda ro lugar sa mga medikong herbularyo. Sa pag ban’aw, hakita nanda sa planggana nga may sueod nga tubi nga isaea gali ka kaharian rondoyong lugar. Ro puno it balete imaw ro poetahan kon magsueod sanda sa andang kaharian ag ro suba sa kilid it tindahan hay imaw ro andang banyo o paealigsan.

Abo nga nag samit nga pukanon rondayang puno. Ogaling ro tawong naga pukan hay naga masakit umpisa paeang. Ro iba hay guina tubuan it mga bokoe sa andang eawas. Guin sug-an man nanda ag guin tambakan it basura agod maghalin ro mga naga estar. Ogaling ra baylo hay abo nga mga hayop ro nagkaeaduea. Kon makit-an man rondayang mga manok, baboy, o baka hay owa eon it dugo ag mga kasudlan.

Owa gid it naka pukan it nunok. Padayon ro pagbahoe ko nasambit nga puno. Umabot sa oras nga kinahangean eon nga magpatindog it tindahan ro banwa it Balete. Nag usoy sanda it mataas it tu-ob nga mediko agod makipag negosasyon sa mga tumawo nga naga estar sa puno.

Sa pagbilog it buean, daea ro mga dueot, nag adto ro mediko sa puno it kahoy. Nag himo it mga seremonyas. Naka hugom ro mga tawo it tumaeagsahon nga kahumot, tanda eamang nga naki-atubang eon ro andang pinaka puno. Nag pungko ro medico sa puno, nagtigis it sabaw it niyog, ag naki tagay sa mga tamawo. Guin plastar ko mediko ro anang tuyo para sa mga kamaeayran it mga tawo. Gin pangayo nana nga maghalin sanda sa ibang lugar tongod paga patindugan it tindahan ro nasambit nga lugar.

Owa magbuhay ag nag kaeasugot sanda nga iga-tao ro andang pangayo sa kondisyon nga indi pagpukanon ro puno tongod mahayga kanda rondayang puno. Tumaliwan ro pilang adlaw. Owa eon it habatian nga kasadyahan ag haeakhak ro mga tawo sa rondayang lugar. Samtang ro mga tawo nga naga estar maeapit sa bukid it Agtawagon hay may hakikita nga kahayag kon gabi-i nga sobra pa sa kahayag it buean ag abo nga mga tawong naka puti ro naga inadto idto sa nasambit nga lugar nga matsa may bayle.

Halin kato, ro bukid it Agtawagon ro padayon nga kaharian ko mga engkanto. Owa guid it nagmeter nga sakaon ro bukid agod tub-eagon ro mga tumawo nga may kaugalingon mat-a nga kalibutan. /MP

No comments: