Ni Tita Linda Belayro
Isla Malalison
Sa punta it Aparri, Cagayan hay may isaeang ka isla nga nagtubo. Isla Malalison kon hingadlan. Suno sa mga katigueangan, owa pa rondayang isla kato. Golpe eamang nga nag soe-pot. Hayra rong estorya kara.
May isaeang ka daeaga nga naga hingaean kay Tarcila. Imaw ra hay maila-on mag pinamasyar. Sa anang pagpanaw, idto pirmi nahaagi sa baeay ko anang mga amiga. Mailaon man imaw mag adto sa baylehan, busa perming owa sa andang baeay. Kon una man sa baeay, indi man masugo tongod perming naga kinatoeog. Haeos abi kada gabii hay naga pueaw si Tarcila.
Isaeang adlaw, nag trato si Tarcila ag anang mga amiga nga mag pamasyar sa pihak nga isla. Hanabuan man ko mga oras ngaron hay masakit man ro anang ina. Nagutom ro anang ina, busa nag paeogaw kana. Bisan masakit ro anang ina, nagpanaw pa guihapon si Tarcila. Owa it mahimo ro anang ina, ngani imaw eon lang ro nag obra ko tanang kinahangean sa baeay. Samtang ro mga mag kabarkada hay naga sakay sa baroto, ro ina ni Tarcila hay golpe eamang natumba ag nag-eoya.
Sa kasakit ag kaakig sa anang onga, golpe nanang nasambit ro, "kabay pa nga may matabo kimo sa mga oras ngara agod madumduman mo ro imong ina". Pagkatapos ko anang pagsambit, nagdueom ag nag daeog-dog. Bumuhos ro mabaskog nga oean ag naghumbak it maeagko sa eawod.
Naeonod ro barotong guina sakyan nanday Tarcila. Pagka-aga, malinong eon ro dagat. Hakibot ro bilog nga baryo ka’t makita nanda ro pagtunga it isla. Suno sa mga tawo, royon ro mga onga nga malalison sa andang guinikanan. Halin kato, guin hingaeanan ro isla nga Isla Malalison. Sa paglipas it paniyempo, nangin santuaryo it kapispisan ag mga kabueakan rondayang isla. Puno man it mga prutas ag puno it kahoy nga naka ta-o it pangabuhian sa mga tawo.
Para ma protektahan ro isla, guina bawaean ro pagpotoe it kahoy ag pagsuga sa isla agod mangin pang engganyo sa mga turista. /MP
No comments:
Post a Comment