Sugilanon Ni Tita Linda

Ni Tita Linda Belayro

Sekreto Nga Eongib

Mabuhay eon nga mga dinag-on nga owa it naga inato sa rondayang eongib. Owa man it interes ro mga ulihing tubo nga tukibon kon ano ro sa sueod ko eongib ngara. Ogaling sa mga katigueangan, rondayang eongib hay baeay ko andang Babaylan ko tiyempo pa it mga datu nga sanda ro nag pamuno sa andang lugar.

May sangka datung masyadong pintas, si Datu Daeogdog. Ro anang sugo hay owa it makabali. Ag kon maakig imaw hay matsa naga daeogdog ro palibot. Si Datu Daeogdog hay maila-on man it babaye. Ka’t imaw hay naka unga sa isaeang ka sueogo-on it reyna, guin patawag nana ro Babaylan agod ban-awon kon ano ro swerte ko anang onga. Suno sa pag tugma it Babaylan, rondayang unga hay eaeaki ag ro maga pabaylo sa pagpangabuhi ko tanan ag maka pahalin kana sa pagka datu.

Naakig si Datu Daeogdog. Bu-ot nana nga bag-uhon ro tugma it Babaylan. Busa anang guin papatay ag gin eubong mismo una sa eongib ro Babaylan. Parabil guin eubong ro Babaylan, nag-daeogdog ag nag pangilat it masyadong masilaw.

Nagtunga ro ma-damoe nga aso. Sa kakibot ko tanan, naduea ro patay nga eawas ko Babaylan. Nag uli ro mga soldado it Datu nga puno it kakugmat.

Halin kato, guin kahadlukan ro eongib. Owa eon it naga sueod sa ratong eongib hasta nagmalinghot ro lugar nga guin tubuan it mga baeagon.

Tumaliwan ro mga dinag-on, nangin siyudad eon ro lugar. Una mat-a guihapon ro eongib. Umabot ro adlaw, may mga Boy Scouts nga nag "camping" sa rondayang lugar. Isaea eon si Pedrito. Pagkatapos nanda it pamahaw, nagpamasyar-pasyar imaw. Tag naga tikang tikang imaw, ,may habatyagan imaw, mingko may naga tawag kana nga mag adto sa eongib. Guin sunod nana ro panawagan kana. Guin adtonan nana ro gina halinan it limog hasta umabot ag nagsueod imaw sa eongib.

May hakita imaw nga magueang nga naga pungko sa bato. Masilaw ro puti nga biste ko magueang. Guin paypay imaw ag guin tawag sa pangaean nga Salim. Hakibot imaw sa anang pangaean. Ham-an it si Salim imaw tawgon?

Guin taw-an imaw it puti nga bato ko magueang ag guin bilinan nga usahon eamang ro putting bato sa kamaeayran. Golpi eang hakatoeog si Salim, paagi sa damgo, guin saysay ko magueang nga imaw gali ro espiritu it Babaylan. Si Datu Daeogdog hay guin kontra it mga tawo. Nag buylog ro tanan nga imaw hay pahalinon sa pagka Datu. Guin tago nanda ro anang unga nga si Salim basi anang ipapatay. Owa nasayuri ko mga tawo kon siin nag adto ro onga it datu. Ro katapusan nanda nga hakita hay idto imaw guin tago sa eongib ag owa eon it binati.

Si Pedrito baea ro unga it Datu sa anang katoeogon? /MP