Sugilanon Ni Tita Linda

Ro Onga It Mangingisda

Si Mariket hay onga it mangingisda nga una naga estar maeapit sa baybay. Kon owa it klase, idto imaw naga hampang sa kweba sakay sa anang maisot nga baroto. Owa pa it mga tawo nga nakasueod sa rondoyong kweba, busa ana tanan ro oras sa paghinampang sa mga isda nga bueawan nga dagaya sa royong lugar.

Isaeang adlaw, Sabado, nagbaeon si Mariket it pagkaon agod maka paayaw-ayaw gid imaw sa paghinampang sa paborito nanang "hide out". Sa sigidang hinampang, ag sa kagaoy ni Mariket, hakatoeogan imaw. Madali malang ag habugtaw. Sa anang pagbugtaw, idto eot-a imaw sa isaeang ka sueod nga puno it mga perlas ag mga batong maeahaeon.

Maangan-angan, may mga serena ag mga siokoy nga nag haead kana it saot. Ro iba hay nagserbe it mga pagkaon. Gumuwa ro pinaka Reyna, isaeang ka sirena nga may edad eon. Guin dawat nana ro alima ni Mariket. Naglibot sanda sa bilog nga kaharian sa idaeum it dagat.

Malipayon si Mariket ag halipatan nana ro anang pamilya tongod sa kulintas nga guin pasuksok kana it Reyna.

Samtang ro pamilya ni Mariket hay sige nga inusoy kana, tanan haeos ro tawo hay nagbueolig sa pag usoy. Ogaling tanan hay napaslawan. Nagmasakit ro anang ina sa pag paino-ino kay Mariket.

Idto eot-a sa kaharian it mga kataw, owa it ibang guina obra si Mariket kundi maghinampang sa mga isda ag mga onga it serena. Sa sobrang pag linagsan ko mga kahampang ni Mariket, nasangit sa bato ro kulintas ni Mariket. Golpe nga nadumduman ni Mariket ro anang guinikanan. Guin usoy nana ro sekreto nga aeagyan paibabaw it dagat. Naka abot imaw sa ibabaw ag hakita nana ro anang baroto nga anang guin tago sa mga bato.

Dali-dali imaw nga sumakay. Idto sa idaeum, hasayran ko Reyna ro pagkaduea ni Mariket tongod hakita nana ro bugto nga kulintas. Guin pa eagas imaw sa higanteng eokos ogaling naka eayo eot-a ro baroto ni Mariket. Nagbalik ro higanteng eokos. Sa kaakig it Reyna, guin sumpa nana nga tanan ro naga aging baroto o saeakyang dagat sa tongod nanda hay anang pa eobugon agod maka-baeos sanda sa tawo. Naka uli sa anda si Mariket ag nagmayad ro anang ina. /MP