Sugilanon Ni Tita Linda

Ni Tita Linda Belayro

Sa Eamang Namatay, Sa Eamang Nabuhi

Malipayon guid si Haring Alfonso tongod suno sa mga manog-bueong sa palasyo, naga daea eon ro anang asawang Reyna. Pag unga it Reyna, isaeang ka gwapahon nga prinsesa ro natawo. Puno it kalipay ro mag asawa. Guin taeana ro engrandeng bunyag.

Kangay ro mga amigong hari ag reyna sa ibang kaharian. Malipayon ro bilog nga palasyo. Samtang naga hilinadya ro tanan, umabot ro bruha nga si Bruhilda. Dati ra imaw nga nobya it hari ogaling owa imaw naila-i ko ina ni Haring Alfonso busa, guin pakasae imaw sa prinsesa sa ibang kaharian. Sa kaakig ni Bruhilda ko mga oras ngaron, guin sumpa nana nga mamatay ro prinsesa paagi sa pag angkit it eamang, ogaling mabuhi mat-a ro prinsesa kon maangkit man imaw it isaeang guin sumpa man nga eamang. Pagkatapos ko anang sumpa, naduea si Bruhilda, umuli sa anang kaharian.

Naduhungan ro tanan. Busa, halin kato, guin mando it hari nga patyon ro tanang makitang eamang sa kaharian. Nagpaindis–indis pa imaw sa makapatay it pinakaabo nga eamang. Ro prinsesa hay owa eon guin pagow-a sa palasyo ag guina libutan imaw pirmi it mga dama sa tanan nga oras.

Isaeang adlaw, samtang naga paligos sa anang dogalingong banyo ro prinsesa, may nagtunton nga eamang halin sa kisame. Owa nakapan-o ro prinsesa nga nahueog ro eamang ag inangkit ro prinsesa. Nagkagulo ro bilog nga palasyo. Guin tawag ro mga manog bueong ag guin suguid nga naga katoeog eamang ro prinsesa. Guin sueod imaw sa saeaming nga kahon. Idto nagtiner ro prinsesa hasta matuman ro masunod nga sumpa.

Tumaliwan ro mga dinag-on, guin tubuan it mga tanum ro palibot it kahon. Nag abo eon man ro mga eamang. Guin butangan it maisot nga gabot ro kahon agod makaginhawa ro prinsesa.

Samtang, sa pihak nga kaharian, may isaeang ka prinsipe nga guin sura ro isaeang ka bruha. Sa kaakig ko bruha, guin sumpa imaw nga mangin eamang. Magabalik eang ro anang dagway kon may babaye nga putli nga makaharo kana. Halin kato, naduea ro prinsipe, nagpinanaw imaw sa dagway nga eamang hasta nakaabot sa kaharian ni Haring Alfonso. Idto nana hakita ro prinsesa nga naga katoeog.

Sa anang kaila, nag usoy imaw it gabot hasta nakasueod sa kahon ag guin haruan nana ro prinsesa. Nagbugtaw dayon ro prinsesa. Pagkakita nana sa eamang, nag pasaeamat imaw ag guin haruan man nana sa kalipay. Nagbalik sa dagway ro prinsipe ag dungan sanda nga nag adto sa hari ag reyna agod isugid tanan ro natabo. /MP