Sugilanon Ni Tita Linda

Ni Tita Linda Belayro

Ro Tatlong Ka Gae-om

Kato anay nga tiyempo, ro mga gae-om hay nagkaeasugot nga mag tipon-tipon sa naka taeana nga adlaw. Guin patawag ko hari ro mga maintok nga gae-om tongod guina atubang nanda ro mga saeampati. Ro iba kanda hay nasakitan.

"Patawara kami mahae nga hari", pakitlo-oy ni Nognog, ro pinaka maitum sa tatlong mga gae-om.

"Maeo-oy ka kamon, mahae nga hari", hinyo man ko kulor abo nga gae-om, si Adolfo ra ngaean. Naga tug-an kami nga indi eon kami mag uman", pangatlo man ni Tisoy, ro pinaka maputi nga gae-om. Naghutik ro reyna it mga gae-om sa anang asawang hari," patawara eon sanda akong asawa. Kinahangean nga taw-an mo pa sanda it obra agod indi eon sanda mag uman."

Nagmando ro hari nga mana-og sanda sa eogta agod mag obra it kamaeayran sa mga tawo. Rikara eamang sanda makabalik ogaling kon indi nanda matuman, paga pinahan sanda.

Owa it mahimo ro tatlong ka gae-om kundi magtuman. Nanaog sanda sa eogta ag nagkasugot nga magbueo-eag.

Nag adto si Nognog sa guina butangan ag guina sug-an it basura. Hakita nana ro isaeang ka mangingisda nga naga kut-kot it mabahoe nga buho.

"Ano ro bu-ot nga matabo?", pangutana ni Nognog. "Bu-ot ko nga maka obra it mabahoe nga tangke, ogaling hasta it makaron, owa pa it naga tunga nga tubi", sabat it mangingisda.

"Ako ro maaeam karon," hambae ni Nognog. Guin pa uean it mabaskog ni Nognog hasta napuno it tubi ro tangke. Malipayon ro mangingisda ag nakabalik si Nognog sa kaharian it mga gae-om.

Samtang si Adolfo hay naka adto sa isaeang ka lugar it mangunguma. Haabutan nana nga masubo ro mangunguma tongod mabuhay eon nga owa it uean. Madali eon lang magkaeamatay ro anang tanum. Na eo-oy si Adolfo sa mangunguma. Busa guin pa uean nana it mabaskog. Nagbunok ag naeatum ro mga tanum. Naulian sa pagkaea-ay. Nakabalik man si Adolfo sa anang kaharian.

Si Tisoy hay napadpad sa lugar nga abong mga tawong guina gutom. Owa man sanda it mga guina suksok nga na-og. Naeo-oy imaw sa mga tawo. Nag paino-ino imaw kon ano ro anang ikabulig. Ko ulihi, may hadumduman imaw. Pagkataliwan ko mga inadlaw ag binuean, isaeang adlaw hakibot ro mga tawo nga may nagtubo nga mga tanum. Ro mga sanga hay puno it puting bueak kapareho it mga gae-om. Guin tipon ko mga tawo ro bueak ag guin obrang eambong ag mahaea. Guin paabo nanda ro tanom ag guin baligya sa ibang lugar. Guin tawag nanda rondaya nga bueak o sa aton pa hay kandaba. /MP