Sugilanon Ni Tita Linda

Ni Tita Linda Belayro

Guinhalinan It Adlaw Ag Gabi-i

Kato anay hay owa pa it gabi-i. Puro adlaw guid lang. Tongod sa pag asawa ni Adlaw ag ni Buean nga naga mahaean sanda it himpit sa kada isaea, ngani permi gid sandang naga iba.

Pagtaliwan it mga dinag-on, guin bugna-an sanda it mga unga. Kapareho man ko andang guinikanan, ro mga inunga hay naga siga nga mingko mga bitu-on: naga hilinampang sanda sa eangit nga naga ta-o it kahayag sa eogta.

Masyadong estrikto si Adlaw sa anang mga unga. Permi sandang guina pangisgan maskin sa maintok nga saea, ag guina pinahan pa. Tongod karon, nasakitan ro mga unga, busa ag naga himunong eon lang sa binit.

Isaeang adlaw, hapanuhan ni Buean nga sige nga minasakit ko mga unga. Bangod resulta ko perming pagsakit ko andang baeatyagon. Guin adtunan ni Buean si Adlaw.
"Ham-an it mas- yadong estrikta ka sa atong mga unga?" pangutana ni Buean. "Tan-awa, permi sandang naga masakit", pagpahayag ni Buean. Ogaling sige man guihapon ro pagdisiplina ni Adlaw sa mga unga. Masubo si Buean tongod indi nana mapabaylo si Adlaw sa anang pag trato sa mga unga. Guin tipon nana ro anang mga unga ag guin hambaean.

"Nanay, nagkasugot kaming magmanghod nga mahalin kami iya sa kaharian ko among Ama. Indi eon namon matiis ro pagtrato kamon ni Amang Adlaw", naga panangison nga hambae ko mga unga.

"Palangga ko kamo, mga unga. Indi ako magsugot nga maduea kamo kakon. Mahalin kita iya sa rondayang kaharian", pasugot ni Buean.

Nagbueag si Adlaw ag si Buean. Bugaeon si Adlaw ag padayon sa anang panindugan. Indi nana mabaton nga pili-on ni Buean nga aywan imaw ag mag-sunod sa andang mga unga. Kada mag plano nga makipagkita si Buean kay Adlaw, naga paeayo ro matina-as taason nga si Adlaw.

Umpisa kato, may una eon nga adlaw ag gabi-i. Si Adlaw, naga hayag kon adlaw ag si Buean naga hayag man kon gabi-i, kaibahan ko anang mga unga nga mga bito-on. /MP