Nagtamod Eamang Kami
Sangka unga it mangunguma si Santoy. Tapos eon ro tig aeani ag naka tubas eon man sanda. Bu-ot eon ni Santoy nga magpasimpaead agod usoyon ro anang mayad–ayad nga swerte. Nag eaong imaw sa anda ag guin sugtan man imaw ko anang ama. Nagpanaw imaw nga may baeong it sangkiri nga pagkaon ag kwarta.
Pag-abot nana sa may sapa-sapa, hakita nana nga namaehan sa binit ro tatlong ka isda. Nag eusob imaw ag guin butang nana sa madaeum nga tubi. Nagpadayon imaw sa anang pagpanaw. Samtang naga tikang imaw sa may pilapil, may hakita imaw nga totognon it pispis nga nahueog sa andang pugad. Ana man nga guin dakop ro totognon, sumaka imaw sa puno agod ibalik sa pugad ratong totognon it pispis. Guin gaoy eon imaw it tinikang. Busa, nagpahuway anay imaw sa puno it mangga. Tag naga pahuway-huway si Santoy, may habatian imaw nga mga reklamo it tagasaw.
"Kabay nga indi eon pag inagyan it mga tawo ro atong guina estaran. Abo eot-a nga samad sa atong mga pamaeay", hambae it pinaka puno it tagasaw. Insigida, guin abangan nana ro daean agod malikaw ro mga tawo sa pihak. Nagpasaeamat ro mga tagasaw. Nag-padayon si Santoy hasta nakaabot sa banwa. Hakita nana ro paskel sa sangka haligi it elektrisidad nga sangka pahisayod it hari.
Naga usoy it asawa ro prinsesa kon may eaeaki nga maka-obra sa sugo it hari". Tongod aresgado si Santoy, nag adto imaw sa palasyo ag nagpresentar. Guin baton imaw ag ro unang sugo hay usuyon ro singsing it prinsesa nga guin haboy sa dagat. Kinahangean nga makita ro singsing parabil matunod ro adlaw.
Samtang naga pungko imaw sa baybayon, ag naga paeoso-eoso kon ano ro himu-on agod makita ro sing-sing, may hakita imaw nga tatlong ka isda nga may tus-on nga singsing. Ha bo-oe ag guin daea nana ro singsing sa hari. Guin baton it prinsesa ro sing-sing. May pangaywang sugo nga ibutang tanan ro paeay nga guin bu-bo sa tunga it kabatuhan. Dapat man matapos ra parabil matunod ro adlaw. Samtang naga tindog imaw, naga paino-ino kon ano ro himu-on, may nag-aeabot nga mga tagasaw. Sanda ro nag obra ko pangaywa nga sugo.
Owa matapos sa daywang ka sugo. Ro pangatlo hay parabil imaw pakaslan it prinsesa, kinahangean nga makabo-oe it prutas it kabuhi sa ika pitong bukid. Rondaya ro pinaka malisod sa tanan nga sugo ogaling owa guihapon imaw naduea-i it pag-eaum. Maangan-angan, may habatian imaw nga pagaspas it pakpak. Hakita nana ro isaeang ka pispis nga may guina angkit nga prutas it kabuhi. Naghambae ro pispis. "Nagtamod eamang kami tongod imo kaming guin buligan kato", hambae it pispis.
Guin kasae si Santoy ag ro prinsesa. Pagkatapos it kasae, nagpangabuhi sanda it malipayon. /MP
No comments:
Post a Comment