Sugilanon Ni Tita Linda

Ni Tita Linda Belayro

Matam-is Nga Kamatayon

Isaeang ka pobreng binatilyo si Lauro. Una imaw naga estar sa eanas. Mahugod imaw magpananum ag mag alila it mga pispis. Guina butang nana sa hawla ro mga pispis agod indi makaun it mga sapat.

Isaeang adlaw, nagbisita si Lauro sa baeay ko anang guina pangasawa. Magkaeapit manlang sanda. Hakita nana nga dagaya ro mga may handum ag naga hueat ko andang oras sa pagbaton kanda agod makahambae ro daeaga. Kat oras eon ni Lauro, ga-oy eong gid ro daeaga. Dugang pa hay guina duyog eon imaw.

Owa it eabot kara, maeamig man ro pagbaton kana it daeaga tongod bukon imaw it gwapo ag pigado pa ro anang pangabuhi. Busa, agod indi eon magbalik ro binata, si Lauro, guin hambaean imaw nga kon makadaea imaw it bueak nga may pugtak nga puea hay batunon imaw. Maeoya nga nag uli si Lauro. Siin imaw ma bo-oe it rayang klaseng bueak?

Sa anang pag-uli, pag abot sa anda, hakita imaw ko anang hayupang pispis nga masinueob-on. Sayod sanda nga mga kapispisan ko anang guina batyag nga kasubo. Ro guin obra ko anang pispis hay guin tinuka ro higot it hawla agod maka guwa. Tag nakaguwa, nag eopad ro pispis ag nag inusoy ko bueak nga puti ag may pugtak nga puea. Ogaling sa anang pag inusoy, owa guid ro pispis it hakita nga bueak nga may pugtak nga puea, kundi puro puti.

Sa owa magbuhay, naka paino-ino ro pispis it paagi. Bu-ot nana nga makabaeos sa anang among mabuot. Eompad imaw it matayog ag pumaidaeum nga binunggo ro anang dughan sa mataeawis nga bato.

Tungod sa pagkanina, umilig ro dugo ag tumama sa mga bueak nga puti. Nagka pugtak-pugtak ratong bueak. Busa, anang guin angkit agod daehon kay Lauro. Pag-abot sa baeay, namatay ro pispis. Duro ro kasubo ni Lauro sa pagkakita sa anang hayupan. Isaeang ka matam-is nga kamatayon ro guin pakita ko pispis ko mga oras ngaron. Maskin ro tuyo it pispis hay buligan ra anang agaeon agod makakita it puting bueak nga may pugtak nga puea. Owa nana pagdaeha ro bueak kundi guin tanum agod magtubo para magserbi nga handumanan sa pispis. /MP