Sugilanon Ni Tita Linda

Ni Tita Linda Belayro

Niños Inocentes

Pagkataliwan ko paskwa, nagasunod ro Niños Inosentes. Rondaya ro adlaw nga guina papatay ro mga eapsag nga natawo idto sa Jerusalem nga mangin hana kay Haring Herodes nga basi maga boeos kana bilang hari.

Sa kaharian ni Haring Sokor, ro dugo it eapsag ro guina haead sa hari agod padayon nga mangin bata guihapon ro hari. Perming naga panugbati ro mga soldado sa bag-ong tawong mga eapsag ag kada isaea guina boe-an it dugo. May una nga namamatay ag may una mat-a nga nabubuhi. Kon owa sanda it makit-an nga eapsag, naga pataas it edad hasta sa daywang dag-on ro andang guina usoy.

Owa it nakasayod kon pila ro edad ni Haring Sokor. Suno sa mga lolo ag lola, bata pa sanda hay bata eon man ro hari, ogaling hasta makaron bata pa guihapon. Agud makalibre ro mga guinikanan, guina tago ro pagnabdos nanda. Kon mabahoe eon ro andang tiyan ko mga naga nabdos, nagapanago sanda idto sa mga eungib agod indi matiktikan it mga soldado. Rondaya ro kabangdanan kon ham-an it naga sangkurot ro mga tawo una sa kaharian ag ro mga eaeaki hay owa naga asawa tongod sa kahadlok.

Bangod sa pagpinangamuyo ko mga tawo, may nag-abot nga propeta. Suno kanda hay sangka ermitanyo tongod imaw paeang nanda hakita una sa lugar. Guin painom ko ermitanyo it tubi nga benditado ro kutob nabdos nga mga babaye.

Adlaw-adlaw nana guina obra ra ag guina bantayan hasta sa pag-unga ko mga babaye. Haeos guina putos it ka kugmat ro mga nanay tongod paga daehon ro andang eapsag sa palasyo. Ka’t idto eon ro mga eapsag, guin pang boe-an eon sanda it dugo. Matsa nauhaw guid nga guin inom ko hari ro dugo. Tumaliwan ro sang oras, pag eatum it dugo, golpe nga natumba ro hari ag nagkisay-kisay parabil mamatay.

Tongod sa pagkamatay it hari, naghugyaw ro tanan, pagkasayod nga mamatay eon ro hari. Mingko nahubad ro andang kahadlok nga nakagapos kanda ko mabuhay eon nga dinag-on. Nag pasaeamat sanda sa ermitanyo, ogaling owa eot-a nanda makita ay nangin dueaan imaw it golpi. Tapos eot-a ro anang misyon. Guin sugo imaw it Diyos bilang sabat sa pangamuyo it mga tawo nga naga kilaea kana nga nagtuga ag manunubos imaw naton. /MP