Sugilanon Ni Tita Linda

Ni Tita Linda Belayro

Ro Babaye Sa Kwadro

Mabuhay eon nga ilo si Nardo sa ama ag ina. Tongod karon, maisot pa imaw hay idto eon mag istar sa anang tiya. Mapintas ro anang tiya ag makasamit eang imaw it manami nga pagkaon kon maka bus-ak it kahoy ag maka sag-ob it tubi. Tanan ro anang pagkaon ag igdaeapat hay baylo ko mabug-at nga mga obra nga guina sugo kana. 

Ko isaeang hapon, samtang naga pahuway-huway imaw sa puno ni Santoe, may umagi nga trak nga may eo-ean nga basura. Tongod madasig ro daeagan ko trak, may nahueog nga kwadro halin sa trak, inapok kana. Guin pueot nana ro nahueog nga kwadro. Guin basa ni Nardo kon ano ro sa kwadro. May nakapintura nga itsura it babaye nga matsa kondesa. Guin limpyohan ni Nardo ro kwadro, guindaea nana sa andang baeay. Ana eon man nga guin trapuhan pag abot sa andang baeay. Guin butang nana sa anang kwarto ratong kwadro.

Ko gabi-i ngaron, ham-an it mataas ta ro anang eagnat? Naga kurog imaw ag guina eamig. Sa anang pag deliryo, habatyagan nana nga guin trapuhan imaw ko isaeang ka babaye, pagkatapos, guin habuean hasta nakatueog imaw. Pagkaaga, naduea ro anang eagnat ag naka obra eon man imaw. Mayad ayad ro anang pamatyag sa anang eawas.

Halin kato kada agahon, parabil magpanaw imaw sa obra, anang guina haru-an ro babaye sa kwadro. Guina kabig nana nga anang ina ro babaye, busa naduea ro anang kahidlaw sa matuod nanang ina. Tumaliwan ro pilang dominggo, ko gabi-e ngaron, haabutan nana nga owa ro kwadro sa anang guin butangan. Anang guin usisa. May hakita imaw nga papel sa lamesa nga may nakasueat nga numero it baeay ag direksyon. 

Pagka agahon, anang guin adtunan ro baeay. Isaeang ka mansyon gali ro anang hakita. Sa uwa man it tawo, nagsueod imaw. Sa anang pagsueod, hakita nana ro mabahoe nga kwadro nga may imahen it babaye nga kapareho man ko babaye ngato sa kwadro nga anang hapueot. Isaea gali ka kondesa ro babaye nga mabuhay eon nga namatay. Sakay gali ratong babaye sa eroplanong nabag-bag ag nasunog. 

Halin ro kondesa sa Pransya nga nagbakasyon sa lugar ko anang asawang konde. Parabil mamatay ro konde, may anang guin suead nga sangka testamento nga mawra: kon sin-o man ro taw-an ko it rayang direksyon, imaw ro mangin tag-ana ko baeay ngara. Rato nga papel nga may sueat ko anang testamento hay anang guin sukbit sa kwadro nga may imahen ko anang asawa.  

Tongod si Nardo ro naka pueot ko testament, si Nardo ro nangin tag ana ko mansion it konde. Abo guid ro pagpasaeamat ni Nardo sa babaye sa kwadro nga guina kabig nana nga ina. /MP