Sugilanon Ni Tita Linda

Ni Tita Linda Belayro

Sa Likod It Gae-um

Ro kabuhi it tawo hay guina putos it kahayag, guina putos man it kadueom. Owa it bisan sin-o man katon nga tawo nga makasinghan nga ro anang kabuhi hay puro eamang kahayag. Owa man it maka hambae nga tanan hay kadueom. May oras nga naga agi guid kita tanan sa rondayang kahayag. Kon amat man hay kadueom. Ogaling tanan rondaya hay omaeagi eamang.

Sa kabuhi ni Annie, ro pag tan-aw nana sa anang pagpangabuhi hay tanan kadueom ro anang palibot. Imaw ra hay guin himuslan it isaeang ka eaeaki nga owa it hakat. Owa imaw pag ulingdi ko ratong eaki bangod sa kahadlok sa anang guinikanan.

Natawo ro anang onga sa tunga it kadueom. Anang guin pangaeanan nga si Lourdes. Sa pagsikway ko ginikanan sa anang ama, sulohanon nga guin abaga ni Annie ro pagpabahoe kay Lourdes. Nagpanaw sanda sa Manila halin sa Cebu agod mag usoy it pangitan-an. May nagbaton kanda nga mag asawa. Owa it unga ro andang amo busa guin kabig si Lourdes nga andang onga. Tongod sa kapisan ni Annie, nagbahoe ro negosyo ko mag asawa. Nagpati ro amo ni Annie sa anang kahugod, matinomanon ag masaligan. Imaw ro guin tugyanan ko negosyo it mag asawa.

May edad eon man ro andang amo. Busa owa mabuhayi, nagtaliwan ro asawa nga babaye tongod sa konsumisyon. Paeahilong abi ro anang asawa. Nagdaeaga si Lourdes nga mahugod kapares man ko anang ina. Tongod kara, palangga guid imaw ko anang guin kilaea nga ama. 

Agod magbilog it uman ro anang pamilya, guin pakaslan ko eaeaki si Annie, ro ina ni Lourdes. Nag iba eon ro batasan ko dating baeo. Nag bag-o imaw. Guin tinguha ko eaeaki nga aywan ro sugae ag inom. 

Owa man kapilahi nag escuela si Lourdes. Sa pagtapos ni Lourdes sa pagka maistra, dungan nga nagsaka sa stage ro anang ama ag ina. Malipayon guid si Annie nga puro kahayag ro anang natan-aw sa palibot. Tama guid ro anang nabasahan sa tueon-an nga sa pihak it gae-um, naga tunga man ro kahayag. /MP