Sugilanon Ni Tita Linda

Ni Tita Linda Belayro

Nagmatuod Nga Damgo

Sa pag pinanaw panaw sa iba ibang lugar ni Dina, may hakilaea imaw nga magueang. Rondayang magueang hay manog pakalimos. Permi nana nga nasu sub-eang ro magueang ngara kon imaw naga hatod it labada sa ba-eay ni Mrs. Andrea Lim. 

Ko isaeang agahon ngaron, samtang nagabuoe si Dina it tinapay, hakita eon man nana ro magueang. Guin taw-an nana it tinapay ro magueang. Nagpasaeamat kana ro magueang. Guin taw-an dayon si Dina it panyo nga puti ag guin bilinan nga ibutang sa idaeum it mahaea nana kada gabi-e parabil matueog. Tanan ro anang pangayo hay itao ko rondayang panyo paagi sa damgo, hambae it magueang. 

Guin tandaan ni Dina ro bilin ag guin tuman ro sugo ko magueang. Ko gabi-e ngaron, timprano pa si Dina nga nag ihapon. Pagkatapos it himos, guin taw-an nana it bueong ro anang inang masakiton. Guin tuman nana ro bilin it magueang parabil matueog. Uwa magbuhay, hadupilok si Dina. Nag damgo imaw nga idto imaw sa tunga it katamnan ag may isa-eang ka puno it kahoy nga naga sidlak ro dahon ag hamueag sa tanan nga kakahuyan. 

Guin paeapitan nana ro tanum ag nagkutoe imaw it pilang ka dahon. May habatian imaw nga limog nga naga sugo kana nga pabukaean ro dahon ag ipa inom sa anang ina. Habugtaw imaw nga may guina buytan nga dahon. Suno sa sugo kana, guin pabukaean nana ro dahon ag ipa inom sa anang ina. Uwa mabuhayi, nag mayad ro anang masakit ag nagbakod pa gid ro anang ina. Halin kato, kon may guina pangayo si Dina guina tao kana paagi sa damgo.

Pagkataliwan it pilang gabi-e, owa eon si Dina it guin pangayo ogaling ko gabi-e ngaron, nagdamgo imaw nga may naga eotos kana nga eaeaki. Paspas ro anang daeagan hasta nakaabot imaw sa pang pang it suba. May tawo nga nagdapit kana hasta imaw nakatabok sa pihak. Sa anang pagbugtaw, idto eota imaw sa pihak nga pangpang. Nagsinggit imaw nga dapiton ag may nag abot man dayon nga baroto. Guin toeok nana ro ea-eaki nga kapares ra itsura ko eaeaki sa anang damgo. Si Cesar gali ra nga-ean, mabuot nga manogdapit it baroto. Ko olihi nag asawa sanda ni Dina ag malipayon nga nagkabuhi kaibahan ko andang daywang ka onga. /MP