Mariang Sinukuan
Ni Tita Linda Belayro
Ro pangaean ni Mariang Sinukuan hay naghalin pa sa ngaean it bukid it Sinukuan. Ogaling ro pagkatawo ni Mariang Sinukuan hay owa it nakasayod ko anang guinhalinan. May nagasugid nga imaw ra rong bunga it pagsanib kong buean ag adlaw. May naga hambae man nga bunga imaw kong pagsanib kong hangin ag tubi. Imaw hay isaeang ka Ada o engkantada nga owa it kamatayon.
Isaeang adlaw, nagdesisyon si Maria nga manaog sa datag ag idto imaw mag-estar. Sa isaeang ka maisot nga payag maeapit sa busay. Nagkabuhi imaw it isaeang ka ordinaryong tawo. Nag alila imaw it mga hayop ag nagpananum man. Pulos matambok ro anang mga tanum nga taeong, kamatis, ag hamtak. Matambok man ro anang mga hayopan pareho it manok ag baboy. Kon may magdakop o magtakaw it anang tanom hay naga taeang sanda nga indi makauli. Maka uli eamang sanda kon i-uli nanda ro andang guintakaw.
May isaea man nga eaeaki nga naga estar sa kagueangan, ma-eapit sa payag ni Maria. Kada agahon kon magpamasyar si Maria hay hakikita nana rong kahugod ni Roberto.
Ko agahon ngaron, nagpakuno-kuno si Maria nga magaeaba sa busay. Sa oras nga naga uli eon si Roberto daea nana ro mga tinoean-on ag prutas agod ibaligya sa banwa, haagyan nana rong daeaga nga naga eaba. Sa kasadya-on kong daeaga, tinukob it kaila si Roberto. Nagpakilaea imaw.
Hasta kato, una eon sanda naga kita kita sa busay. Ko isaeang hapon ngaron, guin hatod ni Roberto si Maria sa andang baeay. Pag-uli ni Roberto, guinpabaeonan ni Maria si Roberto it eoy-a. Pag-abot sa baeay, nangin bueawan ro eoy-a.
Perme eon nga nagabisita si Roberto sa baeay ni Maria hasta nga nagnubyohanan ro daywa. Abo eon nga eoy-a ro nabaton ni Roberto, bosa nagpasyudad imaw agod ibaligya ro mga eoy-a nga bueawan.
Na-engganyo si Roberto sa syudad hasta nalipatan si Maria. Owa eon imaw naga uli-uli.
Nangin masubo si Maria. Guinsumpa nana si Roberto. Guindaea nana ro anang ba-eay ag nangin baeagon rong tanan. Halin man kato, nangin palhi rong lugar ag guin kahadlukan ko mga tawo. /MP
No comments:
Post a Comment