Sugilanon Ni Tita Linda

Tita Linda Belayro

Rong Tunay Nga Nobya

Maeopot nga mag-amigo rong daywang ka hari kong mga kaharian it Barboza ag Labrador. Para mas malig-on ro andang pag amigo guin paasawa nanda ro andang onga nga prinsipe ag prinsesa.
Nagpahaum si Prinsesa Armina agod magbisita sa kaharian ni Prinsipe Fernan. Guin ibhan imaw ko anang dama nga si Ferpida. Kat madali eon lang sanda maka abot sa kaharian it Labrador, guin pauba ro prinsesa ko anang biste ag nagbaylo sanda ko anang dama nga si Ferpida agud malikawan ro mga tulisan nga naga warang sa ruyong lugar. Nagsunod man rong Prinsesa.
Pag-abot sa puertahan it palasyo, guin abi-abi sanda it Prinsipe. Si Prinsesa Armina hay idto magdayon sa lugar it mga kabulig samtang idto sa palasyo rong dama nga si Ferpida.
Kada agahon, guina daea ni Prinsesa Armina rong mga manok ag bebe sa liwan it palasyo agud idto mag-usoy it pagkaon. Kaibahan ni Prinsesa Armina rong binatilyong si Conrad nga manugtatap kong hardin it palasyo.
Isaeang adlaw, samtang nagabantay sanda it mga hayop, nagpamasyar man rong hari sa balkonahe it palasyo. Hakita nana rong Prinsesa nga nagapoeot kong bandana nga inapok it hangin. Tumambad rong bueawan nga buhok kong Prinsesa. Samtang guinasudlay ro anang buhok, hakita man rong kasubo sa anang uyahon.
Guin adtonan ko hari rong Prinsesa ag guin pangutana kon ham-an it masubo imaw, ag ham-an nga guina putos ro anang buhok. Owa magsugid rong Prinsesa. Para mabawasan ro anang kasubo, guinsugo imaw kong hari nga isugid sa atubang it kalan. Guin aywan imaw it hari nga nanago sa likod it isaeang ka haligi. Binuhos ko Prinsesa rong tanan nana nga kasubo. Habatian man it hari rong tanan. Guin tawag imaw it hari ag guin pasuksukan it sadya-an nga biste. Guin patawag man rong Prinsipe agod mag kaon kaibahan kong dama nga naga pakuno-kuno nga prinsesa. Owa guid makilaea ko dama nga si Ferpida rong gwapa nga Prinsesa.
Kat naga pungko eon rong tanan kaibahan kong minatuod nga Prinsesa, naghambae rong hari, "Ano rong penalidad sa isaeang ka tawo nga purilon ag naga pakuno-kuno?" pangutanan kong hari sa dama.
Maabtik man nga sumabat rong dama. "Dapat kana hay ubahan it eambong ag isueod sa dram nga puno it naga ungot nga mga eansang ag ipaguyod sa daywang ka kabayo hasta mamatay".
"Kon imaw ron, ikaw mismo rong nag obra ko imong sentensya. Tumanon rong sentensya", mando it hari. Matapos rong sentensya, ro Prinsipe hay guin kasae sa minatuod nga nobya. Halin kato, sanda eon ro nagdumaea ko daywang kaharian nga malinong ag malipayon./MP