Sugilanon Ni Tita Linda

Tita Linda Belayro

Prinsipe Oso

May daywang ka magmanghod, mga daeaga nga maeopot guid sa kada isaea.
Isaeang adlaw, guinsugo sanda ko andang ina nga magbakae it dagum, hilo, ag garter idto sa Poblacion. May kaeayu-on ro andang baeay sa Poblacion, ag naga-agi pa sanda sa kabatuhan ag sapâ parabil maka-abot idto sa mga tindahan. Sa indi kaeayu-on, hakita nanda ro isaeang ka mabahoe nga pispis nga naga linibot-libot sa may katigbawan. Pagtugpa o pagkahapon kong pispis, nakabati sanda it matinis nga singgit. Pageopad it uman ko pispis, hakita nanda ro isaeang ka duwende nga guina dagit it pispis.
Sa kaeo-oy it daywa, guinhawiran nanda ro duwende hasta nahueog. Guin basoe pa sanda ko duwende ham-an guin hawiran ro anang suksok nga sae-wae ngani nagisi. Guin himos dayon ko duwende ro anang sako nga punô it alahas ag dayon imaw nga naduea sa mga mata-as nga bato.
Nagpadayon sa pagpanaw ro daywang ka daeaga paadto idto sa Poblacion agod bakeon ro bilin ko andang ina.
Pag-uli nanda, hakibot sanda pagkakita eon man nanda sa duwende nga guina bô-bô rong sako it mga alahas agod huyapon kon may kueang. Hakita man nanda ro mga maeahaeon nga alahas nga naga kinang-kinang sa silak it adlaw.
Maangan-angan, may habatian sanda nga ngoeob it oso. Pagkakita kong daywa sa oso, hinadlukan sanda, ogaling owa makahueag sa andang guina tindugan. Bu-ot kunta nga magsueod sa yungib ro duwende ogaling una sa puertahan naga-abang rong oso.
"Mahae nga oso, ayaw ako pagpatya. Haum ako nga ita-o rong tanan ko nga manggad. Kon nailaan mo, hayron rong daywang ka atribida sa akong manggad. Mas mahumok ag bata it abu ko sa kakon, samtang ako hay maganit eon ag magueang pa," pakit-luoy ko duwende.
Ogaling owa pagpamati-i ko oso ro duwende. Sinampok it sang sampok sa oeo ro duwende ag natumba nga owa makahueag. Sa kahadluk ko daywa, dumaeagan sanda agud maglikaw ogaling tinawag sanda ko oso.
Hakilaea nanda rong limog nga dating bisita nanda. Maangan-angan, nagka paeos rong mga baeahibo it oso ag tumambad rong isaeang ka gwapo nga prinsipe.
"Ako hay onga it hari, pagpakilaea it Prinsipe sa anang dogalingon. Guin sumpa ako ko duwende ag guin takaw pa ro akong mga alahas. Naglinibot-libot ako sa kagueangan bilang isaeang ka oso agod osoyon ro duwende. Makabalik eamang ako sa dati kong anyo kon mapatay ko rong duwende."
Guin kasae rong prinsipe sa kamagueangan ag imaw man rong igmanghod hay sa manghod man it prinsipe. Idto mag-estar ro andang magueang eon nga ina sa palasyo. Guin hueay man nanda ro manggad nga habawi sa duwende. /MP