Sugilanon Ni Tita Linda

Ni Tita Linda Belayro

Si Alibaba Ag Ro Magic Nga Kaldero

May isaeang ka manog bakae it bote ag sae-saeon. Ro anang ngaean hay si Alibaba. Kada agahon pa, naga guwa eon imaw sa karsada agod magpamakae it mga sae-saeon ag bote.
Isaeang adlaw, may habakae imaw nga isaeang ka eaging kaldero sa isaea mang ka magueang nga manog pakalimos. Sa kaeo-oy ni Alibaba, anang guin taw-an it sobrang kwarta ro magueang agod idugang nana nga ibakae it pagkaon. Sa perming pag binakae it bote o sae-saeon, nangin suki nana rayang magueang ag anang guina taw-an it pagkaon kada magkita sandang daywa.
Ko isaeang bes, guin uli nana ro kaldero agod limpyuhan. Samtang guina kuskusan nana ro kaldero, nag hayag ra ag may pagkaon nga sueod. Nagkaon imaw ay mga alas dose eon ro oras ag gutom eon. Pagkahapon, guin usoy nana ro magueang agod pasaeamatan ogaling owa eot-a nana makita. Nakapanaw eon imaw.
Ko gabi-i ngaron, pagkatapos it kaon ko pagkaon halin sa kaldero, dayon imaw tumueog. Nagdamgo imaw nga may mga alahas idto sa pihak nga bukid. Guin tandaan nana ro bukid sa anang damgo.
Pagkaaga, bitbit ni Alibaba ro anang kaldero ag guin adtonan ro bukid nga anang guin damgo. Pag-abot ni Alibaba sa bukid ngato, pumundo imaw. Maangan-angan may umabot nga mga naka kabayo. Nanago imaw sa likod it yungib. Nag pundo sanda sa may puertahan it yungib. Nagsinggit ro pinaka puno “Nepo Esmases.” Bumukas ro yungib ag sumueod tanan ro mga kabalyero. Sinundan sanda ni Alibaba nga naga panago sa mga bato. Idto nakita nana ro kaabo-abo nga manggad. Dali-dali imaw it guwa. Pagkaguwa ko mga kabalyero, suminggit eon man ro pinaka puno. “Esolc Emases” ag sumara ro puertahan.
Guin memorya nana rayang mga tinaga. Pagtaliwan ko mga kabalyero, sinamitan nana it singgit “Nepo Emases”. Bumukas ro yungib. Guin sudlan nana ro anang sako it mga alahas hasta mapuno ag gumuwa. Suminggit eon man imaw it “Esolc Emases” ag sumara man. Guin oli nana ro mga alahas ag guin eobong agod tagu-on.
Pagbalik ko mga kabalyero, hapan-uhan nanda nga abong kueang ro andang alahas. Sigurado nga guinbaligya eon ro mga alahas ag mga matambok eon ro nakabo-oe. Guin usoy nanda sa mga matambok ro andang alahas. Si Alibaba nga perming nakikita sa karsadahon hay nag iba eot-a ro anang pangeawason. Kato anay hay maniwang imaw ogaling ko oras ngaron, matambok eot-a. Guindakup imaw ko mga kabalyero ag guin gapos agud bawi-on kana ro alahas. Nagpamalibad imaw. Indi kana magpati ro mga kabalyero. Agod pamatud-an kanda, guin kuskus nana ro anang kaldero. Hakibot sanda sa manami nga pagkaon sa sueod it kaldero. Bu-ot nanda nga bakeon ro kaldero maskin pila nga kantidad. Indi ibaligya ni Alibaba ro kaldero. Guin agaw kana ro kaldero, ogaling eompad ag naduea ro kaldero. Masubo nga nag-uli si Alibaba. Pag-abot ni Alibaba hakibot imaw nga idto eot-a ro kaldero naga hueat kana sa anang baeay.
Sa abu nana nga kalipay, guin amat-amat nana it pag baligya ro anang mga alahas agod ipanupod sa mga pobre. Guin palangga imaw ko mga pobre ag manog pakalimos si Alibaba. Guin obra nanda nga pinuno imaw ag manog apin sa mga guina pintasan.
Kada gutumon imaw, ro kaldero ro anang kaapin. Owa it gutom sa anang mga sakup. Naggueang si Alibaba nga palangga it mga tawo. Hasta imaw namatay, indi mapaea sa andang paino-ino ro pangaeang Alibaba ag ro magic nga kaldero. /MP