Sugilanon Ni Tita Linda

Ni Tita Linda Belayro

Asawa It Kataw

May isaeang ka mangingisda nga guin toeon it isaeang ka mabahoe man nga isda. Idto imaw guin eo-ad sa isaeang ka palasyo sa idaeum it tubi. Mabuhay eon nga owa it hari ro kaharian. Puro magueang eon ro mga sakup ni Reyna Nacarena ag kon indi sanda makakita it hari, o makatakaw it mga eaeaki sa madaling panahon, maduea ro kaharian tongod owa eon it maga padayon.
May isaeang ka mangingisda nga perming guina subaybayan it mga kataw. Ro anang ngaean hay si Rodrigo. Mahugod rayang si Rodrigo, owa it bisyo ag solong naga pangabuhi kaibahan ko anang inang masakiton man. Kada mag adto imaw sa eawud agud mangisda, guina regaluhan imaw it maeagko nga isda ag guina paamanan pa it mga perlas ro mga isda. Owa hitun-e kon sin-o ro naga tao’t regalo.
Ko oras ngaron, nagbugtaw si Rodrigo. Hapan-uhan nana nga idto imaw sa idaeum it dagat. Nagpakilaea kana si Reyna Nacarena. Guin baton ag gin tratar imaw nga bisita. Guin tatap imaw kapareho it isaeang ka hari. Bangud sa mayad-ayad nga pagtatap kana, halipatan ni Rodrigo ro anang guin halinan. Guin maduea ag gin bilang imaw ko mga tawong kilaea nana nga patay eon imaw pagkataliwan it mabuhay buhay.
Bangud sa kasubo ko pagkaduea ko anang onga, nag grabe ro masakit ni Tiya Patring, ina ni Rodrigo. Nagpaabot imaw paagi sa pag pangadi ko anang panga-muyo nga kon buhi pa si Rodrigo hay makita eon lang nana parabil imaw mamatay. Nagbalikwas si Rodrigo. Hadumduman nana ro anang ina. Nag eaong imaw kay Reyna Nacarena nga mabalik anay imaw sa ibabaw it eogta. Nag sugot ro reyna, guin pabaeonan pa imaw it mga perlas agod ipaboeong ro anang ina. Pag-abot ni Rodrigo, hakibot si Tiya Patring. Nagbakod imaw ag nagmayad sa masakit. Guin hipsan nana ro pag-abot ni Rodrigo. Guin taw-an imaw it isaeang ka kabibe agod ihutik kon ano ro anang kinahangean.Halin kato nag manggaranon si Tiya Patring, samtang si Rodrigo hay nangin hari it mga kataw. May mga onga imaw nga sirena ag nagabisita sanda nga mga onga kay Tiya Patring kon guina hidlaw sanda. Sa kada bisita nanda, naga uli sanda parabil magsubat ro adlaw ay basi kon makita sanda it mga tawo kun mahayag eon ag mangin peligro ro andang kabuhi. /MP