Suguilanon Ni Tita Linda

5 Brothers

My limang ka magmanghod nga puro gid sanda eaeaki sa isaeang ka lugar sa China. Pareho ro anda tanang hitsura, ogaling eain-eain eang ro andang abilidad. Kada isaea hay may kina iya.
Si Uno hay makatener it mabuhay sa idaueom it tubi. Si Dos hay makaunat it ag haba-on ro anang alima. Si Tres hay indi madutlan o masunog it kaeayo. Si Kwatro hay makatener man it mabuhay sa yelo. Ag si Singko mat-a hay indi madutlan o manina it taeum.
Nagpanaw si Uno sa Poblacion para manin-dahan. Pagabot sa banwa, may hakita imaw nga pahisayod. “ Kon sin-o ro makabu-oe it mga buea-wan sa naeonod nga barko idto sa idaeum it eawod, ipakasae imaw sa prinsesa. Tongod karun, eagi-eaging bumalik imaw sa anda. Owa eon imaw magpanindahan. Nag uli imaw ag anang guinbalita ro pahisayod sa anang ap-at ka igmanghud. Nagkasugot sandang mag-adto sa barko agud boe-on ro mga bueawan.
Guin eangoy ni Uno sa idaeum it eawod agod tan-awon kon siin na hamtang ro bueawan. Hakita nana. Bangud mahaba it alima si Dos, ngani imaw ro naghulikap ko mga bueawan ag dayon guin pasaka ro ba-oe nga may sueod nga bueawan. Insigida guin daea sa ginoong hari. Guin huyap it hari, ogaling kueang pa kuno. Guinpabangdan si Uno nga ginbuhinan nana ro bueawan.
Raya hay pakana o tukod-tukod eamang it hari agod indi madayon ro prinsesa sa pagpakasae.
Tongod sa pagkueang, guin sentensyahan nga paga utdan it ueo ko hari si Dos. Naghinyu imaw nga ma ea-ong anay sa anang ginikanan. Parabil imaw makabalik, nagpakita si Singko. Bangud pareho ro andang hitsura, owa mataeopangdi ko hari. Guin utdan it oeo si Singko ogaling, na bingaw ag nag dangae eang ro wasay. Indi madutlan si Singko. Nagmando eon man ro hari nga sunugon eon lang. Naghinyo man si Singko nga ma ea-ong man anay imaw sa anang ginikanan. Parabil imaw makabalik, nagpresentar si Tres nga dayon mang gin sug-an, ogaling, indi man madutlan it kaea-yo. Nagmando eon man ro hari nga e-frozen imaw sa yelo. Nagpakita si Kwatro. Imaw man ro natabo kay Kwatro nga indi man madutlan it yelo.
Natak-an eon ro hari. Nag paino-ino imaw it madaeom ag mabuhay hasta naka abot imaw sa desisyon. Ipakasae ro prinsesa! Ipakasae ro prinsesa kanyo? Nagka-sugot ro limang mag manghod. Guin tao nanda kay Uno bangud imaw ro una nga nakasayod sa pabando it hari. Pagka-sayod ko prinsesa, anang guin hinyo sa hari nga boe-on it hari ro ap-at pang ka igmanghud para mangin mga soldado agod maka bulig sa kaharian. /MP