“AK-EAN”

Note: In commemoration of the 52nd Aklan Day, Madyaas Pen is pleased to publish this “Composo” submitted by Ms. Leny Alcedo.

Ak-ean, probinsya nga akon naeoeotan,
Eogta ku akon nga mga ginikanan;
Ginbakae ni Puti, Sarok nga bueawan,
Sa kay Marikudo, hari it kaatihan.

Bilidhon Akeanon, nagsueat it “kudigo”;
Imaw si Kalantiaw, Batangnong husto;
Ag si Bangkaya, ku Panay pangu-eo,
Ay ru Ak-ean – puno it Panay katong tiempo.

Ag paghalin kato, ru Akean naghandum,
Nga sa Capiz kita, gabu-eag it dayon;
Abril biente singko, ru-inagurasyon,
Si Goding Ramos kara rung nagpatigayon.

Ku mil nueve sientos singkwenta y saez,
Rung Akean makaagum it pagka libre,
Isaeang probinsyang, may gobyernong
independiente,
Ngani sa makaron iya kita eagi-eagi.

Aton nga dumdumon rung nagta–ealiwan,
Kon ano rung atong probinsya it Akean;
May maragtas kita nga dapat tipigan,
Hasta sa ulihi nga kaapu-apuhan.

Atong ipangamuyo sa mahae nga Dios,
Rung pa-ea-abuton kung probinsya naton;
Maging malinong ag mangin mauswagon,
Ay kitang Akeanon tawong mabinuligon.

Akon nga tapuson rayang akong kansyon,
Nga una gihapon rung pagpahanumdum;
Aton gid tipigan, ag pakamaha-eon,
Masadya nga binuhatan it mga Akeanon.

Malipayon kita sa rayang higayon,
Ay rung Akean gasilibrar it kahilwayun;
Raya hay pasayod sa tanan gid katon,
Nga rung Akean hay probinsya nga…DUNGGANON!!!