Friday, April 18, 2008

Sugilanon Ni Tita Linda


Ni Tita Linda Belayro

Ro Kanding Ag Ro Lobo

Katong unang tiyempo, may isaeang ka kanding nga Intsik nga may daywang sungay. May tatlo man imaw nga ka onga nga sanday, Hakak, Pukak ag Sungak.
Isaeang adlaw, nagpanaw si Nanay Kanding agod mag-osoy it pagkaon para sa anang mga onga. Sa anang pagtalikod, sumueod sa baeay ro Lobo nga mabuhay eon nga nagabantay kon paano makasueod sa andang baeay. Kinaon ngani nana ro tatlong tiyo ag nagmadali nga gumuwa ag pumanaw. Pag-abot ko nanay nga kanding, masubo imaw nga hakita tongod owa eot-a ro anang mga onga. Hadumduman nana ro Lobo. Umadto imaw sa anang baeay. Sumaka imaw sa atop ag magpinundag. Nagkaea-wasak ro igdaeapat it Lobo ag nagkataktak ro agiw sa pagkaon. Naakig ro Lobo busa guin ayat nana ro Kanding nga magtuos sandang daywa pagkaaga.
Nagdaea it gatas ro Kanding sa panday agod bairon ro anang sungay agud magtaeum. Ro Lobo man hay nagdaea it sangka sako nga pagkaon sa panday agod pataeawison ro anang ngipon. Ogaling, pagbukad ko panday, ro sueod hay mga baeas ag bato. Naakig ro panday. Imbis nga pataeawison nana ro ngipon it Lobo, anang guin gabot tanan nga owa habatyagi ko Lobo.
Pagkaaga, nagkita eon ro daywa. Unang sumugod ro Lobo. Inangkit nana ro kanding ogaling owa makabatyag ro kanding bangud owa man it ngipon kana nga naka angkit. Bumaeos ro kanding. Paagi sa anang matauem ag mataeawis nga sungay, guin wak-wak nana ro tiyan it Lobo ag nag gueowa ro tatlong ka kanding. Nalipay ro Nanay nga kanding bangud buhi ag owa it mga deperensya ro anang tatlong ka tiyo. Hapatay nana ro Lobo.
Umpisa kato, owa eon it guina kahadlukan ro Kanding nga Intsik. Pwede eon nana nga aywan ro anang tatlong ka tiyo nga si Hakak, Pukak ag Sungak ano man nga oras. /MP

No comments: