Sugilanon Ni Tita Linda

Tita Linda Belayro

Nag-date Paagi Sa Damgo

Nag umpisa ro tanan ko isaeang gabi-i tag nag damgo si Zarina nga nag-adto imaw sa isaeang ka isla sakay it isaeang ka baroto. Sa anang pag-abot, may hakilaea imaw nga isaeang ka eaeaki nga ro anang pangaean hay Satur nga taga una man sa isla.
Owa magbuhay ro andang pag suguilanon tongod nag uean it mabaskog busa nagbueag sanda. Parabil sanda magbueag, naghambae si Satur nga magakita sanda it uman paagi man sa damgo.
Pagbalik ni Zarina sa anang trabaho sa baraka, may nagpaeapit kana nga suki. Hakibot si Zarina sa pagkakita kay Satur. Nagsuguid si Satur nga magkakilaea sanda. Maeaka naga bakae si Satur sa rayang baraka ag sa gabii sanda nagakita sa andang damgo.
Isaeang adlaw, may magueang nga nag bakae kay Zarina. Bangud sa mayad ro anang pagtatap sa magueang, kontento imaw sa servisio. Guin taw-an imaw it putting panyo. Ro panyo hay may tumaeagsahon nga kahumot nga maka patueog sa tawo. Raya man hay maka boeong sa masakit kon gamiton eamang sa mayad nga katuyu-an. Sa pag-uli ni Zarina ko hapon ngaron, may hasubeang imaw nga hilong. Bu-ot nga sakiton si Zarina. Hadumduman nana ratong panyo. Guin wasiwas nana sa hilong ag natumba ro hilong nga owa it pangalibutan. Nagpadayon sa pag uli si Zarina.
Ko gabii man ngaron, oras eon man nga magakita sanda si Satur. Sa anang pagdamgo, hakita nana si Satur nga masakiton. Suno kay Satur, owa it boeong sa anang masakit kundi kay Zarina eamang. Ko mga oras ngaron hay owa kay Zarina ro panyo. Ngani pagkaaga, guin butang nana sa anang boe-sa ro panyo agod haum imaw sa andang pagkita. Owa eot-a maka adto si Satur sa anang baraka. Owa man imaw makasayod kon siin naga estar si Satur.
Ko masunod nga gabi-i, nagdamgo imaw ogaling owa man gihapon si Satur. May iba nga nagpakita kana, isaeang ka babaye nga maniwang ag isaeang ka onga nga babaye nga masakiton. Naghinyo ro babaye nga eayu-an ro anang asawa para eang sa anang onga nga masakiton. Kon indi sanda mag eayo, hay mamatay si Satur.
Agud indi sanda magkita ni Satur, owa eon imaw mag katoeog kon gabii para indi magdamgo. Sa adlaw eamang imaw naga katoeog. Kon gabii, bugtaw si Zarina. Nagniwang si Zarina tongod owa it toeog kon gabi-i. Indi matakuran ni Zarina ro owa it toeog. Pagkalipas it pilang adlaw, ag sa masunod man nga gabii nagdamgo si Zarina ag nagkita sanda ni Satur.
Iba eot-a ro anang itsura kaibahan ni Satur ro anang pamilya. Nangayo it patawad si Satur. Owa it mahimo si Zarina. Paagi sa panyo nga perme nanang daea, anang guin pahumutan si Satur. Tumaliwan ro pilang oras nga owa it pangalibutan, nagbangon si Satur nga nagbalik sa dating dagway. Guin patawad nana si Satur. Owa imaw naila nga imaw ro maging kabangdanan sa pagkasamad ko pamilya ni Satur.
Halin kato, owa eon sanda nagakita ni Satur maskin sa anang damgo man lang. Ro panyo anang guin gamit sa pagbulig sa tawo. Guina gamit man nana ro panyo bilang panaming sa mga maeain nga ispiritu. /MP