Sunday, April 06, 2008

Sugilanon Ni Tita Linda

Ni Tita Linda Belayro

Bueawan Nga Eowag

May isaeang ka bubon sa parte it Babaria, Alemanya. Tanan ro tawo hay naga sag-ob kara. Ona man sanda naga eaba, naga bo-oe it guina tug-on, guina hugas ag guina dilig sa mga tanum. Maeayo man o maeapit, naga adto guid sanda agod mag sag-ob. Busa, haeos ro kabuhi it mga tawo ag mga sapat hay naka tumoy rikara sa bubon.
Isaeang adlaw, samtang masako nga naga eaba ag naga paligos ro mga tawo, may isaeang ka magueang nga eaeaki ro nag pundo sa anang panan awon. Indi eon imaw maka bilhot. Guina uhaw guid imaw ogaling indi maka timba bangud sa anang kaeoya. Nangayo imaw it bulig sa mga naga eaba. Owa imaw pag andoha. May nag-abot nga eaeaki agud magtimba. Naghinyo ro magu-eang nga timba-an man imaw.
“Ayaw abi ako pag istorboha. Magtimba ka kon naila ka. Guina hueat ako sa baeay ag naga dali guid ako it duro”, singhan kana ko eaeaki. Nag-panaw eonlang ratong magueang. Pag-abot sa baeay ko ratong nag sag-ob nga eaeaki, hakita nana nga puro eomot ag eonang ro anang tubi. Akig imaw nga nagbalik agod usoyon ro magueang, ogaling owa guid it nakapan-o kon siin imaw mag-adto.
Nagbalik eon man ro magueang. Hapon eon, ogaling abu pa guihapon nga mga tawo nga naga sag-ob. Nangayo imaw sa isaeang ka babaye nga naga timba. Ogaling, nagpamalibad man imaw bangud guina dilig kuno nana sa anang tanum nga mabuhay eon nga owa madilig. May isaea man nga eaeaki nga nag sag-ob agud ipa-inum nana sa anang hayop. Owa imaw naila nga magniwang ro anang baka ag bu-ot nanang magtambok kon anang ibaligya.
Tongod sa owa guid imaw hitaw-i it tubi, nakahambae ro magu-eang nga owa eot-a it tawong mabinuligon. Ogaling owa guid imaw maduea-i it pag-eaum. Maangan angan may isaeang ka babaye nga naga pas-an it banga.
“Ineng, mahimo baea nga imo akong masaeokan it tubi? Nauhaw guid ako it duro.” Sa kaeo-oy it dalagita, guin sag-uban nana ro magueang ag guin painum sa anang tabo nga butong.
“Ineng, may bueawan ka guid nga tagipusu-on. Gamiton mo rayang tubi nga akon guin imnan ag ipainom mo sa mga naga masakit. Gamiton mo rayang eowag”, hambae it magueang. Dayon imaw nga naduea.
Halin kato, abo nga habuligan ro dalagita. Owa imaw nagsukot it bayad. Abo nga mga tawo nga naga dayo halin sa mga maeayo nga lugar agod magpabueong paagi sa tubi.
Ogaling, abo nga nagka interes sa ratong eowag. Ko gabi-i ngaron, naduea ro eowag. Pagtangda nanda sa eangit, idto eot-a ro eowag nga mahayag nga mayad. Naghinoe-soe ratong nagka interes. Nangayo sanda it patawad kay Hannah.
Si Hannah hay nagpabilin nga ulay. Nag sueod imaw sa monas-teryo. Sa gui-hapon, una imaw naga bulig sa mga masakit, mga biktima it giyera. Bukon it paagi sa tubi kundi sa mga sadyaan ag bala-an nga pueong it Diyos. Ro mga tawo nga makabati ko anang limog hay naduduea ro andang kaga-oy ag kauhaw. Nagabalik ro andang kabakud ag pagsalig sa Diyos. /MP

No comments: