Sugilanon Ni Tita Linda

Tita Linda Belayro

Magic Sudlay

Maila-on gid si Rina sa pagtipon it maskin anong bagay nga nailaan nana. May koleksyon imaw it mga bote, lata, takup it tansan, kaha it posporo, pakot ag ko olihi eon hay sudlay. May hapueot imaw nga sudlay sa basurahan. Guin oli nana sa andang baeay, guin limpyuhan ag dayon pamaehon. Ko sangka gabi-i ngaron, parang may naga panuktok sa anang bintana. Anang guin panid-an. Sa pagling-ling, hakita nana ro daywang ka tinuga nga bu-ot boe-on ro sudlay. May mahaba nga buhok, mataeawis ro andang doeonggan ag mahaba ro andang kuko.

Guin kibot nana ro daywa, busa nagdaeagan sa kahadluk. Naga duda imaw nga may kinaadman guid royong sudlay. Anang guin samitan nga isudlay sa anang buhok. Hakibot imaw nga ro anang manipis ag matag-od nga buhok hay naghaba ag nagdamoe.

Pagkaaga, guin daea nana ro sudlay sa mga kalbo ag manipis it buhok.
Abo ro anang habuligan ag ko olihi hay nag manggaranon imaw paagi sa sudlay nga naga padamoe ag pahaba it buhok. Kon gabi-i, samtang naga huyap imaw ko anang kwartang kinita-an, anang ha notahan nga may mga mata nga naga bantay kana.

Rato gali nga daywang ka taga ibang planeta hay may misyon nga balikan ratong sudlay. Indi sanda makabalik sa andang planeta kon indi nanda mobo-oe ro sudlay. Anang guin tawag ro daywa. Nasayuran nana nga ratong sudlay hay hampangan gali ko andang prinsesa. Tongod sa pagkaduea, ro prinsesa makaron hay masakit sa pag inusoy ko anang sudlay. Naeo-oy imaw sa prinsesa busa, bu-ot nanang i-oli sa sangka kondisyon. Parabil i-oli, bu-ot nanang makita ro prinsesa. Guin patoeog si Rina paagi sa pagpahid it balsamo sa anang mata. Pagbugtaw nana, idto eon imaw sa sueod it prinsesa.

Nalipay guid ro prinsesa. Nagmayad ro prinsesa ag nagbalik ro dating kapagsik. Parabil imaw mag-oli, guin taw-an si Reyna it isaeang ka espiho. Kon bu-ot nanang mag estorya sa Prinsesa hay paagi sa ratong espiho.

Suno sa prinsesa, sa mga tawong manipis o kalbo it buhok, magpahid eamang it sabila sa andang buhok. Hasta ngani makaron, ro guina gamit ko mga kaeaeakihan o maskin kababayen-an man nga bu-ot magpaeambo ko andang buhok hay naga pahid it sabila kon magpaligos. /MP