Sugilanon Ni Tita Linda

Pinakamabahoe Nga Bueak

Ro kaharian ni Reyna Flora hay kilaea sa sari-saring klase it bueak. Sa bilog nga Engkantadia, guina dayaw ro anang kaharian. Ratong mga tinoga nga naka adto sa kaharian ngaron hay indi eot-a haeos makadumdum nga mag oli bangod sa kanamion ko lugar. Guina dayo man ra it mga alibang-bang agod maka pangayo ko pinaka matam-is nga nektar. Maw man ro putyukan ag nigwan nga naga himo it dugos.

Kada dag-on, may guina hiwat nga paindis-indis si Reyna Flora sa pinaka mabahoe nga bueak. Ro maga daug hay guina koronahan it bueak; guina padunggan sa bilog nga kaharian. Maeapit eon lang ro paindis-indis. Tanan ro mga engkanto, mga duwende, mga unanong naga estar sa idaeum it eogta hay naga partisipar man. Sa rayang dag-on, ko buean it Pebrero bilang buean it mga tagipusu-on, guin kangay ro Hari it mga prutas. Ro maga daog hay ipaasawa sa anang onga nga prinsipe nga si Prinsipe Apollo. Raya ro premyo sa maga daog.

Tanan nga mga kadaeagahan hay nag pahaum para sa pa indis-indis. Isaea eon si Sampaguita, ogaling natama-an man ro pag masakit ko anang ina.

Dugang pa, suno sa mga alibangbang nga anang amigo, ro naga pabahoe ko mga bueak hay ro propolis o baeayan it mga nigwan nga makita sa tanum nga piedras platas ag guina estaran it mga mapintas nga nigwan.

Agod mabo-oe nana ro propolis, kinahangean nana nga saka-on ro mataas nga kahoy ag magdaea it saeong agod obrahon nga sueo. Tongod desidido guid imaw, nagpanaw imaw. Nagdaea imaw it taguk it saeong, sueo, ag posporo. Naga tunod eon ro adlaw ag amat-amat nga naga dueom. Padayon pa guihapon si Sampaguita. Anang guin sindihan ro anang soeo nga saeong ag sige ro anang panaw. Kat madali eon lang imaw makaabot sa puno it piedras platas, habatian nana ro makahaeadluk nga tunog ko naga hukae nga nigwan.

Pagka humot ko mga nigwan ko hugom it saeong, nagkatoeog it hamu-ok ro mga hayop ag nigwan sa palibot. Bangod karon, libre nga nakabo-oe it propolis. Dali-dali si Sampaguita nga nagbalik sa anda. Ana dayon nga guin sug-an ro propolis ag isabod sa mga tanum. Bangod sa anang kagaoy, haka toeogan imaw. Pagkaaga, hakibot imaw it duro sa pagkakita ko pinaka daeagko nga bueak sa anang prente.
Ko mga oras ngaron, nagalibot man si Reyna Flora ag hakibot man imaw sa pagkakita ko mga bueak ni Sampaguita. Guin proklamar ro pagdaug ni Sampaguita. Guin pakasae man imaw kay Prinsipe Apollo, ro anang premyo.

Kon paano imaw nakapaboeak ko ratong daeagko nga bueak, si Sampaguita eamang ro nakasayod. /MP