Sugilanon Ni Tita Linda

Tita Linda Belayro

Si Pedro Ag Ro Gabot Nga Pilapil

Isaeang adlaw, guin sugo si Pedro ko anang ina. "Pedro," ihatod mo anay ro tinapay idto sa bulag nga magueang sa pihak nga pilapil," sugo ko anang ina.

Nagtuman, nagpanaw si Pedro daea ro libon. Pagtabok nana sa pilapil, haabutan nana ro magueang nga naga hueat sa poetahan. Guin ta-o nana ro tinapay. Dayon, umuli imaw.

Tungod nga mataas pa ro adlaw, nag pamutoe pa anay si Pedro it mga bueak agod daehon sa anang ina. Pagtan-aw nana sa may pilapil, hakita nana ro naga tomag nga pilapil. Sayod imaw kon ano ka peligro kon magbahoe ro buho sa pilapil. Sigurado guid imaw nga abong kasamaran sa andang banwa kon mabukwang ro pilapil. Dali-dali nana nga guin sutsot ro anang alima ag nag umpisa imaw it patabang.

Amat-amat eon nga naga dueom. Ogaling owa guid it nakabati ko anang singgit tongod guina toeon ro anang limog ko mabaskog nga humbak.

Hasta nga natunod ro adlaw, naga toeonga eon ro bituon, eaos eon ro limog ni Pedro it sininggit ogaling owa guid nana pagbuhi-i ro tabon sa anang alima. Nag kagubot eon sa baeay ni Pedro. Pag eaum nanda hay patay eot-a ro onga.

Maangan-angan, habatian nanda ro mga tawong naga sininggit nga may sueo nga guina pas-an kaibahan si Pedro. Hakatoeogan eot-a imaw ag hakit-an imaw it mga tawo nga naga eohod guihapon ag owa guid pagbuhi-i ko anang alima ro gabot sa pilapil.

Nangin baganihan si Pedro sa bilog nga Holland. Kon owa nana pag ideyahe nga ipasak ro anang butkon sa gabot it pilapil, abo eon man kunta nga kabuhi ro naduea. Halin sa eapsag nga guina duyan hasta sa pinaka magueang owa it bukang bibig ro mga tawo kundi ro kabaganihan nga guin obra ni Pedro.

Hasta nga ro pilapil sa Holland hay naga tindog agod abangan ro tubi sa dagat, una ro pangaean ni Pedro naka ukit sa kada tagipusuon it mga Olandes. /MP