Tita Linda Belayro
Ro Baston Ni Haring Jupiter
Si Haring Jupiter ro tatay it mga Diyos ag Diyosa sa bukid it Olympus. Tungod hari, may ana nga baston nga naga tao kana it gahum. Daea-daea nana permi rondayang baston maskin siin man imaw ga adto. Mahimo ko anang baston nga pakalmahon ro mabaskog nga huyop it hangin ag humbak. Masarangan pa nana paueanon o pasilakon ro tiyempo. Busa, abo nga bu-ot mag angkon ko rondayang baston.
Isaea eon si Haring Pluto, ro hari sa idaeum it eogta. Mortal abi nga magkaaway ra sanda ag bu-ot maka baeaos imaw. Una nana nga guin padaea ro anang alilang kabog kay Haring Jupiter. Ogaling, pagkakita sa baston nga masilaw, nabulag ro kabog ag nahueog sa eawod. Owa eon makabalik.
Pangaywa nana nga guin padaea hay ro alilang dragon. Hakibot ro mga tawo sa pagtunga it dragon. Haaywan ni Haring Jupiter ro anang baston idto sa paboritong hardin. Kat ana eon nga balikan, hay una eot-a ro dragon nga haum nga dagiton ro espada. Hakita it isaeang ka magikero ro natabo. Guin magic nana nga islan ro tunay nga espada ag ipaapok ro tunay sa alima ni Haring Jupiter. Nahalin ro atensyon ko dragon sa naga baga-bagang espada. Guin dagit nana rato ag daehon kay Haring Pluto. Pag abot idto, owa it pueos, owa it gahum ro espada tungod peke. Akig nga akig si Haring Pluto. Busa, anang guin paea-as ro dragon.
Pagkasayod ni Haring Jupiter ko obra it magikero nga si Beron, guin taw-an imaw it premyo. Guin daea pa imaw sa palasyo ag guin paestar bilang tagaserbe it hari. Agod mangin immortal imaw kapareho it ibang mga Diyos ag Diyosa, guin painom imaw it dugos it kabuhi nga owa it kamatayan. Hasta makaron, una pa guihapon si Beron sa kaharian ni Haring Jupiter. /MP
No comments:
Post a Comment