Ni Tita Linda Belayro
Manananggae
Naga pati baea kamo sa Manananggae? Sin-o baea ra sanda? Suno sa mga katigueangan, rondaya hay mga eawas it tawo nga naputoe. Ro ibabaw hay naga eopad nga guina tawag nga wak-wak. Ro kaputoe nga eawas hay guina aywan nga naga tindog agod madali sanda mag uli.
Kada magbilog ro buean o kabilugan it buean, naga katoe ro andang eawas. Naga pahid dayon sanda ko andang eana agod madali maputoe ro andang eawas. Maga bueag man ro andang eawas paagi sa pag ugayong. Agod indi sanda makita, naga usoy anay sanda it tago nga lugar, magpasalipod ag idto maga ugayong kapareho it nanay nga naga unga. Matapos ro pag ugayong, amat-amat dayon nga maputoe ro andang eawas ag dayon eompad agod makakita it may mga masakit nga paga boe-an it dugo ag atay.
Perming managob it gabi-e kun mag uli sa andang baeay si Eryong. Sang bises, samtang naga pauli si Eryong halin sa anang sanggutan pag katapos it pagdawat it tuba, naka bati imaw it huni it wak-wak sa anang ibabaw it oeo agod dagiton imaw. Golpe nanang binag-eot ro aswang it sanggot. Nagisi ro anang pak-pak pagkaeo-eo ko anang sanggot nga indi eon imaw maka eopad.
Nagpatabang si Eryong, naduea ro anang kahilungon . Guin usoy nanda ro ka-utod it aswang. Pagkakita, anda dayon nga guin sugpon. Guin bantayan it mga tawo ko gabii ngaron agod makilaea kon sin-o guid ro aswang. Pagkaaga, pag subat it adlaw, hakilaea nanda ro magueang nga guina kuno-kunong aswang una sa andang lugar. May mga onga man ngani imaw nga mga naka tapos man it pag eskuela sa mga kolehiyo.
Natunaw ro anang eawas ka’t anda nga guin wisikan it asin. Halin kato, naduea eon ro magueang. Sa sobrang kahuya ko anang mga onga, nagpanaw sanda idto sa maeayo nga lugar kun siin nga owa it nakakilaea kanda. /MP
No comments:
Post a Comment