Sugilanon Ni Tita Linda

Tita Linda Belayro

Ro Pilyo Nga Kaeag

May kinadaan nga pagpati ro mga katigueangan nga kon adlaw it mga minatay ag　　"Todos Los Santos" guina buksan ro poetahan it eangit agod sugtan nga maka sueod ro mga kaeag nga makabalik it sang adlaw sa andang mga inaywan nga mga kaibahan sa pamilya ag mga igbata. Imaw ron nga naga sindi it kandila sa mga pamaeay agod indi magtaeang ro mga kaeag ag guina paha-uman it pagkaon sa altar ay sigurado nga guina gaoy ag guina gutom sanda sa andang pagwarang.

Samtang naga hueat ro mga kaeag sa pagbukas it eangit, naghibilin si San Pedro, "padipuslan ninyo ro sang adlaw nga guinta-o kinyo. Ogaling dapat maka balik kamo parabil mag ika alas dose it gabi-i tongod paga sarhan ko ro eangit pagtaliwan ko oras ngaron ag indi eon kamo maka sueod. Busa, maga hueat kamo it masunod nga dag-on sa pagbukas eon man it uman.

Pagpitik ko yabe, naga hagiyos ro tanan nga mga kaeag agod makabalik sa andang guin halinan nga mga pamilya. Nag agi anay sanda sa andang mga nitso nga guin eobngan kanda. Naila sanda sa mga sadya-an ag maeahaeon nga bueak ag kandila. Hakita nanda nga bag-ong pintura man ro andang nitso. Una man ro andang mga kaibahan sa pamilya ag mga igbata. Ogaling indi eang sanda makita.

Samtang may isaeang ka pilyo nga kaeag nga nagwinarang agod magpa ayaw-ayaw imaw iya sa eogta. Nakaabot imaw sa mga mall, beer houses, disco bar ag naka sueod pa imaw sa casino. Rondaya abi ro anang guina buhat kat imaw hay buhi pa.

Sa sueod it casino, indi naton mapan-uhan kon adlaw o gabi-e eon ro oras. Owa nana hapan uhi nga oras eon sa pagbalik sa eangit. Tanan ro mga kaeag hay dali-dali nga nagbaealik, ogaling ro pilyo ngara nga kaeag hay idto pa sa sueod it casino. Pagka pan-o nana nga alas dose eot-a gali it kaaganhon, dali-dali imaw nga bumalik ogaling sarado eot-a ro poetahan it eangit.

Sige ro anang pinanuktok ogaling owa guid imaw pagbuksi. Suno kay San Pedro, sa masunod nga Todos Los Santos pa imaw makabalik sa eangit. Busa, samtang iya imaw sa eogta, dapat mag obra imaw it kamaeayran sa mga tawo.

Basi baea una imaw sa inyo makaron? O basi isaea eon imaw nga nakabulig kimo? /MP