Sugilanon Ni Tita Linda

Ni Tita Linda Belayro

Hari It Mga Kobra

Pinaka mabagsik sa tanan nga sawa ro kobra. Kon maka angkit ra imaw hay naga guwa ro kamandag sa anang pangil ag pilang segundo, mamatay ro biktima o ro ha angkit.

Si Ador hay isaeang ka mangangayam. Idto imaw naga estar sa kagueangan. Ro anang pangita agod mabuhi ra pamilya hay ro mag dakop it mga sawa agod ibaligya sa mga naga paguwa it karnabal. Ko isaeang agahon ngaron, nagpahikas eon imaw agod mag adto sa kagueangan. Pag abot nana sa anang paborito nga eongib nga pahuwayan, may hakita imaw nga isaeang ka puting panyo nga may naka marka: "Ro tawong maga buyot kara ro kilaeahon nga hari it mga kobra. Gamiton eamang ra sa kamaeayran ag indi mag datae sa eogta".

Guin tago nana ro panyo sa anang dughan agod indi mahueog. Pagkakaon nana, nag umpisa eon imaw it saka sa mga dalipi ag eoka hasta naka abot si Ador sa guina pugaran it mga kobra. Pag abot nana, hakita nana ro mga patay nga kasapatan nga owa eon it atay ag tagipusuon. Una ro karnero, kanding, baboy nga tamaeonon ag mga baka. Sa sobra nanang kaakig, sinueod nana ro eongib. Idto hakita nana ro pinaka mabahoe nga kobra nga ro utod hay tawo ag ro ueo hay kobra. Maka ngingidlis ro mga sawa.

Bu-ot nana nga dumaeagan agod maeagiw ag magguwa sa eongib. Ogaling hadumduman nana ro puting panyo. Nagpundo si Ador. Guin bo-oe nana sa anang dughan ag dayon guin wasiwas. Pagkakita ko mga sawa hay nag eogpay sanda bilang pagkilaea ko bag-ong hari.

Pagkakita man ko dati nga mga hari it mga kobra, nag alimpapasa imaw tongod sa kaakig nga guin boe-an eon imaw it gahum. Sa anang pag alimpapasa, nahueog imaw sa kumunoy nga ana man nga obra. Isaea imaw ka mapintas nga hari nga kon indi masunod ro anang kagustuhan, anang guina pahaboy sa kumunoy.

Umpisa kato, si Ador ro guin kilaea nga hari it mga kobra. Guin duea man nana ro kumunoy ag guin bawaean ro nga kobra nga mag angkit sa mga tawo, puwera eamang kon guina sakit sanda. Bihira eon lang makaron nga makit-an ro mga kobra tongod sa idto sanda naga estar sa mga lugar nga owa haeos guina adtuni it mga tawo. Idto sanda naga kabuhi kaibahan ko iba pang kobra sa idaeum ko gahum ni Ador. /MP