Sugilanon Ni Tita Linda

Ni Tita Linda Belayro

Ro Maisot Nga Pueang Mus-an

Pilang dag-on eon ro nakataliwan sa Banga. May isaeang ka puting agak ro haabutan ko isaeang ka pueang mus-an nga naga pinanghayhay ko agahon ngaron.
"Malisod eot-a ro paniyempo makaron. Siin eot-a baea nag aeagto ro mga eago? Kato anay, sang kahig ko eang hay abo eot-ang eago ro naga toeonga. Makaron, haeos tanan ko tinumpok nga dahon hay ha ukay ko eon ogaling owa it maskin sambilog akong hakitang eago", masubo nga mitlang it agak.

Habatian imaw ko pueang mus-an. Ogaling owa guid imaw magreklamo. Anad eot-a imaw nga naga pangabuhi sa tiyempo it tigmaea-ea ag maskin tiyempo man it tig baeaha. Eompad ro agak ag tumugpa sa eaging galingan agod mag umpisa it pagkahig.

"Owa guid ako it tiyempo nga hasayran nga ako hay nawad-an it eago," paniguro ko mus-an. Pumili eon man it bag-o nga lugar nga owa pa naka agi it pagkahig. Hakit-an imaw it agak. Guin eas-ay imaw nga owa kuno it eago sa lugar ngaron. Sige ro pagkinahig it mus-an.

"Dapat nga adtonan ko ro mga eago, tongod indi man sanda mag-adto kakon," hambae it mus-an. Samtang sige nga reklamo ko agak. Mainit kuno ro adlaw ag masunog ro anang panit. Matig-a kuno ro eogta, ag kon anu-ano pa nga pulos malisod ro anang guina sinambit. Madali lang magdueom. Pag-abot it gabi-i, owa imaw it ihapon. Nag umpisa eon imaw nga naka batyag it gutom ag kaduyog. Hakita nana ro mus-an nga bag-ong abot.

"Sigurado nga ga-oy ka eon, ag eabaw sa tanan gutom ka pa". May pagkabaeaka nga hambae it agak.

"Nagpahuway-huway manlang ako, samtang naga bantay it pagguwa it eago", sabat man it mus-an. Eompad ro mus-an sa anang haeapunan agod magkatoeog. Samtang naga agaw-agaw ro anang katoeogon, naghambae imaw, "Mga inunga, pamatii ninyo raya: Bugana ako sa eago ag malipayon, tongod busog ako nga mayad. Una pirmi ro eago, kinahangean nga imo eang nga bantayan ag kahigon."

Husto guid ro eago. Kinahangean nga purgahon naton ro atong tagipusuon ko kaila sa pagpaka eomo ag pirming maeomo. Ibutang naton pirmi sa atong paino-ino ro sumpa ko katamaran. Maga madinaeag-on kita kon ibutang naton sa atong kabuhi ro kahugod. /MP