Sugilanon Ni Tita Linda

Ni Tita Linda Belayro

Ro Banga Ni Zimador

May isaeang ka baeo, si Zimador. Daywa sanda nga naga kabuhi ko anang waeong dag-on nga onga. Kada agahon sa andang pag pangabuhi, daea nana ro anang banga agod mag sag-ob it tubi halin sa bubon. Sa parte it Palestino, ro banga ro guina sudlan it tubi pareho man anay sa Akean ko pilang dag-ong nagtaliwan tag owa pa ro mga plastic. Banga man ro sueodlan ko andang harina ag eana nga guina obra nga tinapay. Ro banga ro simbolo ko andang kabuhi tongod sa rondaya ro sueodlan ko andang guina eaha nga mga pagkaon, guina taguan it eana ag imaw man ro guina saeokan it tubi.

Ko isaeang agahon ngaron, hakita ni Zimador nga sangkiri eon lang ro andang harina ag eana. Pang ilabas eon lang nanda nga daywa ko anang onga. Busa, nag panaw imaw daea ro anang banga agod mag sag-ob it tubi. Parabil imaw umuli, nangahoy pa anay imaw it mga sangang kahoy agod igatong. Tag naga pauli eon imaw, may hasub-eang imaw nga magueang. Nalipay ro magueang. Nagpangayo kana it pagkaon. Owa magbalibad si Zimador. Anang guin sampit sa anang baeay ro magueang nga malipayong nagsunod. Pag abot, guin papahuway anay imaw samtang guina eaha pa nana ro katapusan nga harina agod ipakaon sa magueang.

"Indi bale nga mawad-an kami, ro mahayga hay nakabulig ako sa isaeang ka guina gutom. Kon mamatay guid man kami hay sa akto it kaeo-oy", may pagsalig nga hambae ni Zimador. Pagkaeaha ko hikot, guin dat-on nana sa bisitang magueang.

Samtang naga kaon ro magueang, guina tueok nana it madaeum ro mag ina. Hapan uhan nana ro hantop nga pagtu-o sa mata ko baeo. Matapos ro pag pakaon, nagpasaeamat, ag nag ea-ong nga mapanaw eon ro magueang. Parabil magpanaw ro magueang, naghambae imaw, "Paga bugayan ka it grasya tungod sa imong pagkamaeo-eoy-on." Ag tumalikod dayon ro magueang.

Samtang guina himos ni Zimador ro guin kan-an ko magueang, dungan sa paglimpyo ko anang banga nga owa eon it sueod, hakibot imaw nga puno it harina ag eana ro anang banga nga naga hilira sa papag.

"Propeta siguro ratong magueang", hambae ni Zimador. Dayon imaw nga eomhod ag nag pangadi it pag pasaeamat sa Diyos. /MP