Ambrosio R. Villorente
Greedy
Ko isaeang Martes nga nagtaliwan, Enero 11, idto ako sa Malacañang Palace, Manila. Nag iba ako sa among onga, kay Denis. Sa anang tatlong bagay nga nahuman sa anang pagpamuno it "Advanced Science and Technology Institute" hay hapili-an ratong tatlong anang binuhatan. Gin kilaea nga pinasahi nga binuhatan busa, gin pa dunggan it "Career Executive Service Board" it atong gobiyerno.
Tag naga hueat kami kay Pangueong Noynoy Aquino nga maga panupod it plaque, may naka kilaea kakon nga sangka Aklanon man. Ana akong guin eapitan. Nag kamustahan kami.
Owa kapilahi, ana akong gin pangutana kon ano ro kahueogan it "SUEOK". Hakibot ako, ham-an ha-adto kami sa rikato? Ogaling, akon mat-a imaw gin sabat. "Ano makon, greedy?" Tumango imaw, "huo".
"SUEOK"
Ro sueok makon sa English hay "greedy", excessively desirous of wealth, power, honor, profit, and others. May mabaskog nga handum nga mangin "hyper" mang-garanon, taga li-og nga ginansiya, ana tanan ro dungog ag taga eomopong nga poder o poderoso.
"Bukon mana ro sueok hay hambae nga bagay sa tawong gutom? Owa ka pamahaw ag kailabas?" anang pangutana.
"Taw-i abi mana ako it instansiya nga ro sangka tawo hay sueok", anang padoeogya.
Kon owa ka makon ka pamahaw, kailabas hay nagutom ka, nasueokan ka. Tongod na sueokan, abo ro imong kaunon, sobra sa regular. Busa, ro naga kaon it sobra, maskin busog eon ag sige pang kina-on, mawron do SUEOK. Hay ano mana ro epekto kon sueok ro tawo? Maakop imaw. Budli eon sige pang kaon maskin ro iba hay gina gutom pa.
Ano ro iba pang hambae nga sueok man ro kahueogan? Sueok, maakop, hangoe, hakug. "Hay kon hangoe ako it dungog, owa’t sayod?" Mayad kon hangoe ro tawo it dungog tungod ro anda karon nga handum hay maghimo it kamaeayran para sa tawo ag banwa. Ogaling kon hakug ro tawo sa poder hay "catastrophe", imaw man ro tawong maakup it manggad. Duro eon do anda, hingabuton pa ro ana it iba nga sangkuruti manlang.
Ro MKWD, nag ginansiya it sobrang P17 million ko 2007, nag ta-o it Christmas gift sa mga empleyado it balor P8 million ko paskwa 2010. Makaron, nagpataas pa it pagsukot sa andang pagpatubod it tubi. Ro andang concessionaires hay gina pigos pa gid. Hakug sa ginansiya, hakog sa manggad.
"Mahimo baeang mag ehemplo man naton kon ano ro tawong sueok sa poder?"
Duro! Sa tanan nga lebel it gobiyerno. Abong hangoe it poder.
May sangka babaye. Imaw hay nag Undersecretary it DTI eon, senador ag pangaywang pangueo it Pilipinas. Eabi gid sa tanan, pangueo it Pilipinas it siyam nga dag-on. Ogaling, gutom pa it poder, nasueokan pa it poder, hangoe. Busa, si Ms. Gloria Macapagal Arroyo hay congresswoman eon man.
May sueok man it poder nga mga Aklanons?
Ikaw eang magsabat ko imong pangutana ngaron. Mayad nga mag bakasyon ka sa Aklan agud masabat mo ring pangutana.
Hay basi hakug man sanda sa dungog? Umuli ka man agod makita mo man do andang inobrahan.
Umabot eon si Pangueong PNoy – 1:30 it hapon. Viva Kay Senior Sto. Niño! Viva! /MP
No comments:
Post a Comment