Ni Tita Linda Belayro
Paskwa Ko Mga Ati
Si Don Pepe sangka tawong mahambae natong pilantropo. Owa ra imaw naga ta-o it bulig sa mga ordinaryo nga tawo. Owa man imaw naga tambong sa mga pagtililipon nga magarbo ag kapin pa gid ro guina utang agod igasto sa pag hig-ea hig-ea. Kontra man nana ro naga inutang agod isugae o ipangabuhi it magarbo.
Kon bisperas it paskwa, naga suksok imaw it gunit-gunit sa anang pagwarang sa kalye agod makita ro minatuod-tuod nga hitsura it mga tawo. Kon amat, naga adto imaw sa mga lib-lib nga lugar nga owa haabot it sibilisasyon.
Isaeang ka bisperas it paskwa, nakaabot imaw sa lugar nga guina estaran it mga Ati.
Owa it elektrisidad ag abong buho-buho ro karsada. Bugana mat-a sa tanum ro lugar ag malimpyo ro naga ilig nga tubi sa suba. Pag-abot nana sa pinaka plaza, owa guid it mga paha-um o maskin puni ro lugar. Matsa ordinaryo guid lang nga adlaw. Nag usyoso imaw sa isaeang ka pamaeay. Nangayo imaw it tubi. Guin taw-an man imaw it tubi halin sa banga nga guin tabo it bagoe.
Dali-dali imaw it uli ag guin tipon ro anang mga sueogo-on. Guin pahaum ro mga daeae-hon sakay sa anang helicopter. Pag-abot sa lugar, nag paeanago ro mga Ati tongod imaw paeang sanda nakakita it helicopter. Guin papanaog ro mga kinarton. Tongod kara, nagpaeapit ro tanan. Guin buksan ro mga karton ag guin panupuran ro mga tawo it mga hamon, keso, bugas, ag mga de lata. Dugang pa kara, guin taw-an pa sanda ni Santa Klaus it kwarta.
Pagtaliwan it paskwa, nag aeabutan man pagka taliwan it pilang adlaw ro mga igdaeapat, inhenyero, pareho it bulldozer, truck, pison, ag grader agod sementuhon ro andang karsada. Guin patindugan pa sanda it "reservoir" it tubi ag elektrisidad.
Tag matapos ro mga konstraksiyon, nag iba eon ro andang estilo sa pagpangabuhi ko mga tawo sa lugar ngato. Nag ugan ro andang pangabuhi. Pirmi nandang hadu-dumduman nga may isaeang ka Santa Klaus nga nag-abot kanda ag nag daea it abong kamaeayran agod mabatyagan ro espiritu it paskwa. /MP
No comments:
Post a Comment