Thursday, January 06, 2011

Sugilanon Ni Tita Linda


Ni Tita Linda Belayro
Pinakamabahoe Nga Bueak
Dungan sa pag-ugsad it buean, nagbukead man ro pinakamabahoe nga bueak sa kaharian ni Reyna Petalya. Ro solo nga nakasayod ko pag buskad it rayang bueak hay ro mga duwende sa idaeum it eogta. Owa man it nakasayod nga sa pagbukead it bueak hay naga sabwag man it grasya para sa mga guin pintasan, ag guina daug-daug. Inabutan it sanggatos nga dag-on parabil mag- bukead ro bueak ngara.

Ko mga oras ngaron, abo guid ro naka gapos sa gahum it mga kapre ag higante. Sanda ro may kagamhanan. Maskin ro reyna hay sa idaeum pa ko andang gahum.
Isaeang adlaw, nagpahangin-hangin ro reyna sa anang hardin. Masubo guid imaw tongod naeo-oy imaw sa anang nasakupan. Hakita nana nga nagbuskad eon ro pinakamabahoe nga bueak. Habatyagan nanang mingko guina toeod imaw nga tan-awon kon ano ro sueod it bueak. Hakita nana ro mga bato nga maputi sa sueod.

Hadumduman nana ro suguilanon ko anang lola nga mabuhay eong nagtaliwan hanungod sa pagbukead it pinaka mabahoe nga bueak nga may kon ano nga bagay ikaw nga makita. Ro bagay ngaron hay maka bulag.

Dali-dali nana nga guin tipon ro mga bato, guin putos it panyo, guin sueod sa anang dughan agod indi makita it mga higante. Guin patawag nana ro anang hardinero ag guin sugo nga taw-an it bato ro kada preso nga soldado agod maka guwa sanda tanan sa presuhan.

Bangod indi eon sanda makita, naghimo sanda it madaeum nga kut-kot, guin butangan it mata-eawis nga sibat sa idaeum. Pagkasayod ko mga higante nga nakaguwa ro tanan nga preso, naakig sanda ag nag gueowa agod eagson ro mga bihag. Ogaling, pag abot nanda sa guwa it palasyo, owa nanda hapan-uhi ro mga kut-kot nga may mataeawis nga sibat. Guin eu-ad ro bato nga guina um-um it mga soldado. Naghugyaw ro tanan tongod nakalibre eon sanda sa gahum ko mga mapintas nga higante. /MP

No comments: