Sugilanon Ni Tita Linda

Ni Tita Linda Belayro

Prinsipe Valiente

Ko mabuhay eon nga mga dinag-on nga nagtaliwan, ro kaharian it Bersalya hay guina pamunuan it isaeang ka maisog nga hari. Imaw ra hay si Haring Alpeus. Abong kaharian ro anang guin eopig ag nadag-an nga giyera. Busa, abo man nga hari ro naakig kana.

Kon ano kaisog si Haring Alpeus, imaw man ka bu-ot ro anang asawang reyna. Nagmana kana ro anang onga nga si Prinsipe Valiente. Naga bahoe nga matinahuron ag maeo-eoy-on sa mga pobre si prinsipe Valiente. Guin hanas imaw ko anang ama sa naga kaeain-eain nga pakikipag away. Guin tun-an man imaw it iba-ibang klase it hinangiban agod proteksyon sa anang kaugalingon.

Tongod sa abo nga mga kaharian ro naakig sa hari, guin bayaran nanda ro isaea sa mga opisyal it palasyo agod hilu-an ro hari. Nagmasakit ro hari. Guin patawag ro mga duktor, medico ag mangin aeamon agod tugmahon ro anang masakit. Apang owa guid it nakatugma.

May iseang ka magueang ro naghambae nga isaeang ka prutas ro maka boeong sa hari. Rayang prutas hay nagatubo sa pinaka mataas nga bukid. Dugang pa hay guin bantayan it isaeang ka serpyente nga may pitong ka oeo.

Abo nga mga soldado ro nagpasimpaead agod mag ani it prutas ngato. Ogaling owa eon nakabalik sanda. Ko ulihi, owa eon it naga presenter ngani hapilitan si Prinsipe Valiente agod magpanaw man. Sakay sa anang kabayo, nakaagi imaw sa isaeang ka baryo nga abo ro guina gutom. Anang guin pana-o ro anang baeong mga pagkaon sa mga tawo. Sa masunod nga baryo hay may namatyan. Indi ika paeobong do patay ay kueang do andang kwarta para ibakae it kabaong ag sa pag eobong.

Guin buligan man sanda ko prinsipe. Ro pangatlo nga lugar hay madaeum ro baha nga umagi kanda busa, ana man guin buligan. Gaoy nga gaoy eon ro prinsipe hasta hakatoeogan. May magueang kana nga nagpakita sa anang damgo. Guin dayaw imaw ko anang guin obra. Guin taw-an imaw it isaeang ka baston nga pagagamiton pag abot sa guina adtonang bukid. Sa anang pag bugtaw, nagpadayon imaw sa anang panaw hasta nakaabot sa puno it kahoy nga anang guina tuyo ro bunga.

Nagtunga dayon ro serpyente pagka hugom nga may tawo nga naga abot. Pag eapit kana, guin gamit nana ro baston agod ibunae sa serpyente. Namatay ro sawa. Ana dayon guin ipo ro prutas. Nagbalika dayon imaw sa palasyo. Pag abot sa palasyo, tanan ro mga tawo hay naga taeangis. Madasig nga guin pihak nana ro prutas ag ipuga sa baba ko anang ama.

Nabuhi ro hari nga matsa damgo eamang ro hanabo. Nag hugyaw ro bilog nga palasyo. Naghiwat ro hari it kasadyahan bilang pasaeamat.

Pagkamatay it hari, guin saylo ro korona kay Valiente. Minatu-od guid man ro anang pangaean tongod bukon eamang imaw it maisog nga makig away, kundi man ro anang baeatyagon sa pagbulig sa mga tawo. /MP