Entrepreneurial Farmer

Ambrosio R. Villorente

Limang Porsiyento Kay Sr.

Nakabaton it daywang ka pahisayod do Entrepreneurial Farmer halin sa Aklan Electric Cooperative. Ro una nga pahisayod hay ro pag ta-o it limang (5) porsiyento nga diskwento sa kada buean baeayran sa kuryente.

Rayang diskwento hay mayad ko sa owa gid. Ogaling ro laye nga gina sandigan agod mataw-an it diskwento ro "Senior Citizen" nga naga bakae it kuryente hay beinte (20) it ana, bukon it lima naga hambae baea ro laye nga lima (5)? o napueo, (10)? Ro sugo tana hay 20 porsiyento ro diskwento.

Pila baea makaron ro mga Senior Citizen (60 years old plus) nga naka pangaean kanda ro andang electric concession?

Ro pang taw-an it diskwento hay ro naga usar eang it 100 kilowatt hour panaba. Kon sobra sa sanggatos (100) hay owa it discount.

Sa concessionaires, maisot ro diskwento. P5.00 kada P100.

Ogaling mabahoe ra sa Akelco. Sa kada P100 million nandang kolektahon, ro limang (5) porsiyento hay P5 million man, maadto sa concessionaires bilang diskwento. Kon sa kilowatt hour, sa 100 million, owa it bayad ro 5 million tongod diskwento.

Rayang pag ta-o it diskwento sa Senior Citizen hay maka engganyo sa mga pamilya nga ro andang "electric meter" hay ipangaean sa senior citizen. Basi abu karong isaylo ro electric meter sa Senior Citizen? Raya man ro baeos sa mga may edad eon.
Ro ikaywang pahisayod hay ro pagtaas it "re-connection fee" halin sa P50 hasta sa P100. Nagtaas it 100 porsiyento.

Rayang pagtaas it sukot sa reconnection fee hay pabor ako. Una, maga turo ra katon nga kinahangean gid nga bayaran ro atong utang o mga bagay nga atong hapadiposlan pareho it kuryente. Dapat gid sukton sanda sa andang atrasado o pag pabongoe-bongoe nga bayaran ro utang.

Kon indi, ano ro paghingaean kanda? "BALASUBAS?" Ikaywa, raya ro pag patuman it guina tawag nga "equity and fairness", pare-pareho ro pagtatap sa kada isaea, sin-o man sanda.

Ham-an ga bayad ro kaabo-an pag abot sa oras? Ag ro iba hay ga bayad it atrasado?

Maakop

Ro akong guin sueat hanungod sa sueok, hangoe, ag hakog hay naka buo-oe it reaksiyon sa pilang batong mga naka basa.

Sambato, taga Malay nga indi ko eon pag hingadlan da ngaean sa pag respeto ko anang hinyo hay nagtawag paagi sa telepono agod mag tao sa anang reaksiyon hanungod sa "greedy".

Hayra ra among pag baylo-baylo it hambae sa telepono. Hambae ni Ising: "Kueang pa ro sueok, hangoe, ag hakog".

Ano makon do kueang? Ra anang sabat: "halipatan nimo ro hambae nga "maakop". Ano ro maakop? Anang sabat: "Bu-ot nanang mamahan tanan o angkunon tanan ro manggad, poder, dungog ag iba pa. Congressman eon do eaki, mayor do asawa, konsehal do onga Congressman man do igkampod. Sa masunod nga eleksiyon, may switching eoman kuno. Bu-ot mamahan tanan. Poder, manggad, dungog. /MP