Sugilanon Ni Tita Linda

Ni Tita Linda Belayro

Paha Ni Hudas

Suno sa owa ikasueat nga estorya, paha kuno ni Hudas ro anang guin gamit sa pagpanghugot. Ro anang paha ro guin higot sa anang le-og ag guin higot sa kahoy nga bubog. Abo nga mga tawo ro nagka interes sa ratong paha.

Kon ham-an sanda man lang ro nakasayod? Ro paha hay guin baligya sa mata-as nga haega bilang koleksiyon. Nag saylo-saylo sa eain-eain nga tag-ana ro paha. Ko olihi, owa it nakasayod kon sin-o guid ro naga panag-iya.

Agud maboeong ro kaibog sa ratong paha, nag obra ro mga tawo it eain-eain nga disenyo it paha. Rondaya ro guina suksok it mga onga ag guina tawag nga paha ni Hudas. May nag-obra man it rebentador nga paha ni Hudas nga kon sindihan hay mga tunga sa oras ro sige-sigeng pag linupok.

Ogaling, pag abot it kwarisma, indi naton malipatan kon paano guin baligya ni Hudas ro atong Ginuo. Sa kantidad nga 30 bilog nga pilak anang guin kanulo ro anang maestro. Pagkabaton nana ko pilak, guin sukot imaw ko anang konsensiya ag kat indi eon nana matakuran, nag adto imaw sa puno it bubog ag idto mag panghugot paagi sa pagbitay gamit ro anang paha.

May naga hambae nga ro paha ni Hudas hay may sumpa. Naga pakita eang rondaya sa eain-eain nga mga tawo sa eain-eain man nga henerasyon. Kapareho ko natabo sa isaeang ka tawong paeahilong ag sugaroe. Tag owa eon imaw it cuartang ibakae it guina inom ag guina taya sa sugae, hadumduman nana do sangka paha. Anang hakita ag guin buoe, dayon ana nga guin bali-og ogaling, habatyagan nana nga guina eo-ok imaw hasta namatay. Nagpanaw eon man ro paha ag hapueot it manog bote.

Guin poeot man nana ro paha ag daehon sa anda. Guin limpyohan ro paha agod ibaligya. Abu ro kabak-eanan.

Ko gabi-i ngaron, sinaka imaw it manakaw agod takawon ro anang kwarta. Pagsueod it mga manakaw, hakita nanda ro paha nga may mga nag idlap nga bato. Andang pinoeot, ogaling nagbaga ro paha ag guin poeopotan sanda hasta namatay.

Siguro, maskin sa anong bagay nga guina gamit sa kaeainan hay may sumpa. Ogaling kon sa kamaeayran ro paggamit, dueot hay kapahuwayan. /MP