Sugilanon Ni Tita Linda

Ni Tita Linda Belayro

Bolang Kaeayo

Si Ernesto hay isaeang ka manog bantay it mga baka ag anwang una sa andang lugar. Abo ro naga tawag kanang bakero. Isaeang adlaw, samtang guina tipon nana ro mga hayop, may hakita imaw nga matsa bolang kaeayo. Anang guin bantayan rayang taeagsang bagay naga kanabo. Guin suguid nana sa ibang tawo ro anang hakita ogaling, guin hibaygan eamang imaw.

Naga tunga rondayang bolang kaeayo kada kahapunanon. Nalipay imaw tongod may manog limpyo it sapatos, manog-bantay it tangke ag mangunguma nga nakakita man gali. Ham-an it mga kubos eamang ro nakakita ag bukon it mga mangin aeamon? Ano baea rondayang bolang kaeayo?

Ro planetang Zar hay guina patihan ko andang siyentista nga magueang eon ag mas magueang pa sa atong planetang eogta. Sa pag pahaum, nag disenyo ro hari ko rondayang planeta it isaeang ka kapsula agod igasudlan ko anang solong unga nga eaeaki ag malikaw sa pageopok ko andang planeta. Sa pag abot ko naka taeana nga tiyempo, guin sueod ro eapsag sa kapsula nga naga katoeog. Kumpleto it kagamitan ro kapsula ag rondaya hay maga eayag sa giwhanan hasta nga masuyop ko bato balani it ibang planeta.

Sa pageakbay ko rondayang kapsula, amat-amat imaw nga naga paeapit sa atong planet, imaw ron nga may nakakakita ko rondayang kapsula nga naga baga-baga. May tiyempo man nga indi makita rondayang kapsula depende sa posisyon ko atong kalibutan.

Umabot ro adlaw nga nahigop imaw ko atong planeta ag idto imaw tumugpa sa lugar it mga mangunguma. Hakibot ro tanan. Pagbahaw ko kapsula, guin buksan nanda ag hakita ro eapsag nga naga katoeog. May pangaean nga Zurex ro anang lampin, busa guin tawag imaw sa rondayang pangaean. Nagbahoe imaw nga maaeam ag eabaw sa tanan ro anang abilidad. Duro ro anang nasayuran, taliwas sa abilidad ko ibang mga onga. Nangin maabtik ag maaeam nga lider si Zurex ag guina tahod ko tanan. Nakaasawa imaw ag naka pamilya. Isaea man ka maaeam ro anang onga. Mabahoe ro pasaeamat ko mga tawo tongod sanda ro pinili ko planetang Zar nga magbaton ko regalo nga nagpabaylo ko andang pagpangabuhi. /MP