Ni Tita Linda Belayro
Ro Bolang Kaeayo
Magueang eon ro planetang X-ur. Mas magueang pa gid ra ko sa atong Planetang Eogta. Sa huyap it mga sayentista ko royong planeta hay pilang adlaw eon lang ro habilin ag mag eapok rondayang planeta. Nag pahaum ro hari para sa anang bag-ong tawo nga prinsipe. Guin pa obrahan nana it kapsula agod idto isakay ro eapsag ag kon siin man imaw nga planeta itugpa.
Umabot ro adlaw it pag paeopad sa prinsipe. Masubo ro tanan eabi guid ro hari ag reyna. Kompleto imaw sa igdaeapat. Guin patoeog anay imaw parabil paeoparon ro anang kapsula. Mga pilang adlaw nga naka eopad ro kapsula ag eompok ro bilog nga planetang X-ur. Owa guid it kabuhi nga habilin.
Samtang naga eayag sa kahanginan ro kapsula it prinsipe, owa pa gid it planeta nga maeapit sa kapsula agod maghigop para may matugpa-an. Sa kabuhayon, amat-amat nga naga eapit ro kapsula sa atong Planetang Eogta. Hasta nga hakita eon imaw ko mga tawo sa atong planeta nga naga bantay sa isaeang ka bolang kaeayo. Guin kabaeak-an ko mga tawo kon ano rondayang bolang kaeayo nga golping nag tuga eamang sa kaeangitan. Sa mabuhay eon, umabot man ro oras nga nagtugpa rondayang bolang kaeayo sa isaeang ka maeapad nga katamnan.
Pagtahaw ko nasambit nga bola, hakita ko mga tawo ro isaeang ka kapsula nga may sueod nga eapsag nga naga katueog. Kompleto sa pagkaon ag igdaeapat ro eapsag. May nakasueat nga Xurex ro anang lampin, busa guin hingaeanan nanda kay Xurex ro unga.
Nagbahoe si Xurex nga maaeam. Mas eabaw pa imaw ko sa ibang mga onga. Pag abot nana sa pagiging hamtong nga binata, guin obra imaw nga pinuno sa andang lugar. Sa anang kahugod ag kaaeam, guin himo nana nga progresibo ro andang lugar. Sayod si Xurex ko anang guin halinan tongod naka tanum eot-a ra sa anang paino-ino. Sayod imaw nga owa eon ro anang planeta, busa guin bilang nana ro eogta nga pangaywang kalibutan. /MP
No comments:
Post a Comment