Ni Tita Linda Belayro
Ro Bugaeon Nga Pabo
Guina pabugae ni Pabo ro anang mayad ayad nga baeahibo. Sa bilog nga kasapatan nga may pakpak, imaw eamang ro naga panag iya it sari-saring kolor nga baeahibo. Abo kanang naga kahikaw nga mga manok, pispis ag bebe. Busa nagdugang pa guid ro anang pagkabugaeon.
Isaeang adlaw, samtang naga kinahig sa eogta agod maka tuka ro mga manok ag agak, umagi si Pabo.
"Hay kon ako kinyo, indi ako mag kinabudlay it pagkinahig. Masamad ro akong kuko ag mahigkuan pa ro akong baeahibo. Hueaton ko eon lang nga mag gueang ro mais ag baeatong", pasaring nga hambae ni Pabo. Naga hueat it haum ro Pabo. Imaw nga imaw ro guina inobra it Pabo kada agahon.
Kon gabi-e, idto imaw naga katoeog sa mataas nga tinumpok nga kahoy ay basi angkiton imaw it mga eanggam. Samtang ro mga manok hay una sa idauem naga katoeog.
Tumaliwan ro mga inadlaw. Ogaling, owa guihapon naga gueang ro mga mais. Ro baeatong hay owa man natuling. Indi pa mahimong anihon. Naka batyag it kagutom ro Pabo. Tongod sa kainit, amat-amat nga nagkaeamatay ro dahon it mais ag imaw man ro baeatong.
Isaeang gabii, may isaeang solterito, nag agi sa kamaisan, hilong nga naghaboy it upos it sigarilyo sa kamaisan. Tongod may kaeayo pa ro upos, hinay-hinay nga nag makot hasta golping sumiglab ag nasunog ro kamaisan. Nasunog ro mga mais ag baeatong, sipot guid. Tongod sa owa eon it makaon, napilitan nga magkaon it sunog nga mais ag baeatong ro bugaeon nga Pabo. Tongod sa kinaon, nagsakit ro anang tiyan. Sa kaeo-oy ko mga manok, andang guin tabang, guin bueong ro Pabo. Guin pakaon it eab-as nga eago agod matampi ro kasakit.
Nag mayad si Pabo. Halin kato, kaibahan eon imaw it mga manok nga naga usoy it pagkaon. Kon tiyempo it pagpu-po ko mais ag ani it baeatong, guina taw-an ko Pabo ro mga manok agod maka baeos man imaw sa guin himo kana nga kamaeayran. /MP
No comments:
Post a Comment