Ni Tita Linda Belayro
Magkaeapit Baeay
Si Donya Patria hay isaeang ka manggaranon nga tawo, may mabahoe nga negosyo. Pirme ra imaw nga naga adto sa ibang nasyon agod mag pamakae para ibaligya sa anang mga suki. Isaea eon ro asawa it senador, mga kongresista ag mga milyonaryong kakilaea sa sosiyudad.
Masyadong estrikta si Donya Patria sa anang mga kabulig. Parabil imaw humalin sa anang mga paeanawon, abo pa gid ro anang bilin. Sambilog nga owa nana naila-i hay ro bisitahan imaw it mga pobreng igbata ag mga manog pakalimos. Busa, perming sarado ro anang baeay. Nahadlok imaw sudlon it mga manakaw.
Isaeang adlaw, may nagtuhaw nga sunog sa andang lugar. Idto si Donya Patria sa andang hacienda sa Davao. Nabilin eamang ro anang mga sueogo-on. Hasta sige ro idlab it kaeayo, sige man ro andang sininggit it tabang. Habatian ko mga kahilapit-baeay ro singgit it mga kabulig. Guin saka nanda ro mataas nga pader it Donya ag guin takod ro hose it tubi agod pa puslitan it tubi agod tapna-on ro sunog. Ro iba hay nag hakwat ag nag paguwa ko mga igdaeapat, samtang ro mga kababayen-an mat-a hay naga bantay ay basi takawon ro mga maeahaeon nga muwebles it Donya.
Pagkaaga, nag abot si Donya Patria pagkatapos nga guin patuon imaw ko nahatabo. Una pa guihapon ro mga kahilapit naga bantay sa mga igdaeapat. Guin indorso nanda kay Donya Patria ro tanan nga owa guid it buhin nga mga bagay. Duro ro pasaeamat ni Donya Patria sa mga tawo. Bilang pasaeamat, nag-hiwat imaw it isaeang ka pagtipon-tipon. Guin kangay nana ro tanan nana nga kahilapit. Nagpahaum imaw it mga regalo nga bugas, de lata, eambong, ag kwarta sa mga nagbulig kana. Ratong ibang pamilyang nasunugan hay guin buligan man nana nga mapatindog ro andang baeay.
Halin kato, perming bukas ro anang puwertahan it baeay eabi guid sa mga pobreng naga pakalimos. Guin patun-an nana ro mga onga una sa palibot. Guin taw-an man nana it kapital sa negosyo ro mga kababayen-an. Nag-pasaeamat imaw sa Diyos nga may tiyempo pa imaw nga makabawi sa anang mga kakueangan. /MP
No comments:
Post a Comment