Sunday, July 07, 2013

Sugilanon Ni Tita Linda

Ni Tita Linda Belayro

Sa Kuko It Mga Sindikato

Abo nga mga onga ro naga kaeaduea sa lugar ni Tikboy. Suno sa anang mga suki nga mga pulis, ro kabangdanan hay bangod sa kapabaya-an, sa kasaku-on ag bangod man sa kapobrehan. Ro mga onga hay guin dudahan nga guina gamit sa bawae nga oeobrahon ko mga sindikato. Ro iba man hay guina baligya sa ibang tawo nga owa it onga. Ro iba hay guina patay, boe-on ro ibang parte it eawas pareho it bato (vile) agod ibaligya sa mga may masakit sa andang kaeawasan. Si Tikboy hay naga limpya-bota, naga baligya pa it balut, sigarilyo ag mani. Eain-eain ro anang suki. Kada isaeang suki hay anang guina kilaea ro andang trabaho. 

Ko isaeang agahon ngaron, hapan-uhan nana nga may guin dawat nga sobre ro anang suki sa isaeang ka manog pakalimos. Nagpanaw ro onga ag gin sundan ni Tikboy ro unga. Nakaabot sanda sa isaeang ka bar ag guin dawat ko onga ro sobre sa isaeang ka naka dyaket nga eaeaki. 

Pagkaaga, may daea eon man nga unga ro anang suki. Guin sundan ni Tikboy ro eaeaki kon siin sanda gaagto. Guin daea ro unga sa isaeang ka bodega. Matsa may nahadlukan ro anang suki. Agod indi imaw mapan-uhan, sumaka si Tikboy sa ibabaw it bodega ag maglingling sa maisot nga bintana.

Sa anang paglingling, hakita nana ro abo nga mga unga. Ro iba hay naga katoeog ag ro iba hay naga tangis. Guin daea ro ibang onga nga bag-ong bugtaw sa liwan agod magpakalimos. Idto nasayuran ni Tikboy ro kahueogan it Sindikato. Dali-dali imaw nga nag adto sa estasyon it pulis ag guin saysay ro anang hakita. 

Basi sa guin saysay ni Tikboy, dali-dali nga guin “raid” it mga pulis ro bodega. Hadakpan ro mga kaibahan sa sindikato. Guin pang uli ro mga unga sa andang guinikanan. Ro iba hay guin paboeong pa it Department of Social Welfare and Development.

Halin kato, nangin maabtik eon nga “asset” it mga pulis si Tikboy. Imaw hay isaeang ka baganihan sa mata it mga kapulisiyahan. /MP

1 comment:

Tiradauno said...

Gusto mo ba ng online work?
Earn while you enjoy time with your Family & Lovedones!
Email me: tirada_uno_23@yahoo.com / tiradauno@gmail.com / n.helphelphelp@gmail.com
For more details, kindly visit http://www.unemployedpinoys.com/