Friday, July 26, 2013

Sugilanon Ni Tita Linda

Ni Tita Linda Belayro

Sapatos Ni Karen

Mahugod magtipon it sapatos si Karen. Abo ro anang koleksyon halin pa sa iba-ibang nasyon. Raya hay mga regalo ko anang ama nga naga trabaho sa ibang lugar. Ro iba hay regalo man kay Karen sa anang kaadlawan (birthday), o kon may okasyon pareho it paskwa. 

Ogaling kon ayawan eon imaw it suksok ko sapatos hay ana eang guina pilak sa binit. 

Isaeang adlaw, naghapit imaw sa tindahan it mga sapatos. May nakursunadahan imaw nga pueang sapatos. Tag naga bilid imaw ko anang naila-an, may magueang nga nagpaeapit kana. 

“Bu-ot mo ro sapatos”? pangutana ko magueang nga babaye. “Sadyaan kunta, ogaling owa ako it kwarta”, sabat ni Karen.

“Sige, regalo ko kimo”, baeos it babaye. Guin bayaran ro sapatos, tina-o kay Karen. Duro guid ro kaila ni Karen. Pag abot sa andang baeay, guin sukat nana ro sapatos. Tamang-tama guid ro sukat kana. Nagsaot imaw sa kalipay. Ko olihi, indi nana mapunggan, sige ro anang pag sinaot. Gumuwa imaw sa baeay, sa kalye, hasta sa kaeati-an. Kaibahan ko hangin, naga eopad-eopad imaw sa pagsinaot. 

Ko olihi, ginaga-oy eon imaw. Ogaling indi nana mapa pundo ro sapatos sa pagsinaot. Guin hukas nana ogaling masyadong gutok sa anang siki. Mayad ngani ay may bakero nga nakakita kana ag guin buligan imaw nga ma uba ro anang suk-sok nga sapatos.  Umuli imaw. Tongod sa kaga-oy, hakatoeogan imaw nga owa naka ihapon. 

Pagkaaga, guin sampit si Karen ko anang ina nga magsimba. Eobong abi ko anang igkampod nga si Becky. Owa madiparahi ko anang ina nga pueang sapatos gali ro guin suksok ni Karen. 

Pag abot sa simbahan, sa tunga it naga misa nga pari, matsa guina sugo si Karen nga mag guwa. Maskin anong pugong ni Karen sa pagguwa hay owa imaw it mahimo. Nakaguwa guid imaw nga owa hipan-uhe ko anang ina. Idto imaw nagderetso sa plaza, hasta sa mga kaeati-an, sa kabukiran nga owa it pundo sa pagsinaot. Owa guid mapapundo ni Karen ro sapatos nga may sa demonyo. 

Ko olihi, nag adto imaw sa naga pamukan it kahoy. Ana eonlang guin papotoe ro anang siki agod maka libre sa gahum it sapatos. 

Nakalibre si Karen sa sapatos ogaling owa eon imaw it siki. Guin daea imaw ko mga tawo sa ospital.

Nag abot ro anang mga ginikanan ag guin sugid nana ro tanan. Naduea ro sapatos ag owa it nakasayod kon siin nag adto. Siguro naga usoy eon man kon sin-o ro mangin masunod nga biktima. /MP

No comments: