Ni Tita Linda Belayro
Gabi-e Sa Kabuhi Ni Riza
Guina kabig nga ro mga mapait ag masubo nga hitabo sa atong kabuhi hay kaibahan it mga pagsubok. Rondaya ro gabi-e sa atong kabuhi tongod puno it kadueom ro atong hakikita sa palibot. Naga hulikap kita kon siin ga adto ag kon ano ro atong himu-on. Ro masakit pa hay owa kita it madangpan nga mahimong makabulig katon.
Kay Riza, masyadong madueom ro anang kabuhi. Halin nga nailo imaw sa anang ina, guin aywan pa imaw ko anang ama. Nag asawa it hostes ro anang ama. Haagyan ni Riza nga mag pakalimos ag magutoman. Kon kis-a, una man naagahan sa kalye si Riza kaibahan ko ibang mga onga nga owa man it ginikanan. Sa anang malinghod pa nga edad nga dose años, hadumdoman nana ro bilin ko anang ina nga magpangamuyo sa Diyos kon may problema. Perme si Rizang naga pangamuyo parabil matueog.
Indi man malipatan ni Riza ro mga gabi-e nga guina sakit ko anang ama ro anang ina konmag abot sa anda nga hilong. Naeo-oy si Riza ogaling owa imaw it mahimo kundi magtinangis kaibahan ko anang ina.
Sa anang pagpanaw, may hakita si Riza nga kapilya sa lugar ngato. Nagsueod imaw, nag eohod ag nagpangamuyo. Sa tunga ko anang pagpangadi, may nagtapik sa anang abaga. Sa anang paglingot, may babaye nga naka belo ro nagdawat kana it sobre. Pagtalikod ko babaye, guin buksan nana ro sobre. Mabahoe nga kantidad ro sueod it sobre. Guin bak-ean nana it pagkaon ro mga unga sa kalye ag nag ea-ong nga magpanaw.
Tumaliwan ro sang dag-on, guin balikan nana ro mga onga. Guin daea nana sa anang baeay. Guin pakaon ag guin bak-ean it mga igdaeapat. May maisot nga Baraka si Riza ag kaean-an. Ro mga onga ro naga bulig kana sa anang pag baligya.
Malipayon si Riza sa eoyo ko mga onga. Nakataliwan eon ro gabi-e sa anang kabuhi. Guin sabat ro anang pangamuyo ag makaron nangin malig-on eon sa pag atubang sa anang bag-ong kabuhi kaibahan ko mga onga nga kapares man nana. /MP
No comments:
Post a Comment