Karibal Nga Syokoy
Ro Isla Miramar, hay guina panag iyahan ni Don Vicente ag Donya Basilia Rivera. Bantog ag guina dayo it mga turista rondayang Isla. Kaabuan ko mga nagaagto sa isla hay mga milyonaryo. Dugang pa sa kasadya kong Isla, isaea sa mga guinadayo hay rong daeagang onga nga si Armina. Guina katapangan nga diwata si Armina kon naga buead sa silakan, o mag eonoy sa dagat kon kahapunanon tongod sa anang kaputi ag mahabang buhok.
Samtang nagasakay imaw sa isaeang baesa, nagapaeutaw-eutaw imaw sa tubi ko hapon ngaron, hakita imaw it Syokoy. Naila – an imaw it Syokoy ko mga oras ngaron. Agud makabulig ro Syokoy sa mga tawo, nagbulig imaw sa pagpabugana permi ko dakop it mga mangingisda. Mabakas man rong pag inihaw sa baeay bakasyonan it mga preskong eokos, isda, pasayan ag alimango.
Naga inabo rong mga naga visita sa rayang Islang Miramar. Isaea eon si Roselo. Nabighani it tudo tudo si Roselo ag haeos una eot-a naga tener sa rayang baeay-bakasyonan nanday Armina.
Owa it kalibutan rong daywa: si Roselo ag Armina nga may naga ngit-ngit sa andang matam-is nga pagsugilanon. Ko isaeang agahon, si Roselo hay nag eangoy eangoy sa baybay. Sa owa it suko-suko, guin hunos rong siki ko nagaeangoy nga si Roselo. Owa nakatunga rong binata. Naduea nga owa nasayuri kon siin nag-adto si Roselo. Nag eapta rong balita hanongod sa pagkaduea ni Roselo. Maski patay nga eawas ni Roselo, hay owa gid it dinahum dahum.
Ro masunod nga nagpangasawa kay Armina hay si Arman. Pagkatapos it paligos sa baybay, nagpamanlaw imaw sa isaeang ka paealigsan ko hapon ngaron. Nagpakita rong Syokoy. Kinuryente imaw busa nasunog ro anang eawas. Mas nagduda rong mga tawo sa misteryo nga ga katabo sa Isla Miramar. Guina patihan nanda nga may sumpa kay Armina rong mga kataw ag ibang nagakabuhi sa idaeom it kadagatan.
Nagkabuhin rong mga turista nga naga visita sa Isla Miramar. Masubo rong mag-asawang Don Vicente ag Donya Basilia. Mas masubo si Armina bangud owa it kasiguruhan kon imaw hay maka-asawa pa o indi. Sa likod kara, ro andang hardinero nga si Percival hay nagpaeapit kay Armina agod lingaw-lingawon. Nag subeang ro andang mga mata. Puno it paghigugma rong kay Percival. Puno man it kangawa rong kay Armina. Ma-angan – angan, umabot rong Syokoy. Mabuhay eon gali nga naga binantay imaw sa daywa.
Guinbuhos ko Syokoy rong tanan nga ka imon kay Percival. Paagi sa anang baston, nag buga it kaeayo agod tupukon si Percival, ogaling maabtik rong binata nga guinsagang ko anang saeaming rong kaeayo ag bumalik rong kaeayo sa Syokoy busa nasunog rong Syokoy.
Guindayaw si Percival sa anang kaisog. Owa mabuhayi, guinpakasae sanda ko Don ag Donya. Sa pagkaduea kong Syokoy, nag amat-amat it balik rong mga turista. Hasta makaron, sandang mag asawa rong naga abi-abi sa mga turista. /MP mailto:madyaas_pen@yahoo.com
No comments:
Post a Comment