Saturday, August 05, 2006

Public Speaking Contest Pagahiwatun


Ro Kalantiao Toastmasters Club hay maga hiwat it "public speaking contest". Raya hay paga hiwatun sa ika 31 it Agosto, 2006 sa Capt. Gil Mijares, Poblacion, Kalibo, Aklan.
Sono sa gin pahayag ni Dr. Ramona Magayanes, pangulo it Kalantiao Toastmasters Club, ro pa indis indis ngara sa pag hambae hay bukas sa mga estudyante sa high schools ag sa college.
Ro contest hay maga gamit it English. Ro pa indis indis para sa college level hay (prepared speech) pahaum nga discurso nga may kaangtanan (relevant) sa theme it pa indis indis nga "Honoring Heroes".
Ro sa high school mat-a hay impromptu. Ro andang topico hay idto ita-o sa kaadlawan it paindis indis.
Ro "speech contest" hay gina pati kasog sa pagbueoligan it Kalantiao Toastmasters Club, Local Government Unit of Kalibo paagi kay Mayor Raymar A. Rebaldo, ag Rotary Club of Kalibo sa pag pangueo ni Gus Solmirano.
Ro mga mapili-an nga unang tatlong mayad sa anang paghambae hay maga baton it P1,000 cash ag plaque – unang lugar (1st prize); P750 ag plaque – ikaywa (2nd prize); P500.00 ag plaque – ikatlo (3rd prize) para sa high school ag college. Paga premyohan man sanda it tig one year free subscription it Madyaas Pen nga para sa library ko andang eskwelahan. Tanan nga participants ag coach hay maga baton it "Certificate of Participation".
Ro San Lorenzo College hay maga ta-o it six months scholarship for caregivers sa first prize sa college level paagi kay Mrs. Cecile C. Dela Cruz.
Rayang pa indis indis hay gina hiwat it Kalantiao Toastmasters Club para mapa umwad ro mayad nga pagpaino ino, mayad nga pagpamati ag mayad nga paghambae. (Better thinking, better listening and better speaking). Gina hiwat man ra agud malikawan ro kahadlok (stage fright) ko sangka tawo sa pag atubang ag pag pahayag sa publiko ko anang bu-ot hambaeon.
Ro mga interesado mag entra sa rayang paindis indis hay makipag-ambit (contact) eang sa Editorial Office, Madyaas Pen, 168 Dr. Gonzales Street, Kalibo, Aklan. Tel. No. 268-6238. Mahimo man makipag hambae kay Dr. Ramona Magayanes, Dr. Cynthia Dela Cruz, Ms. Melrose S. Lunn o sa inyong kilaeang mag kaibahan sa Kalantiao Toastmasters Club. /MP mailto:madyaas_pen@yahoo.com

No comments: